Nvidia и Amazon со нови инвестиции во Германија, Берлин вети 800 милијарди евра до 2028 година

На самитот „Инвестирај во Германија“ во Берлин сојузната влада обезбеди партнерство со компанијата за вештачка интелигенција Nvidia и нови инвестиции од интернет-гигантот Amazon, пренесува Euronews. Настанот, на кој присуствуваа околу 200 директори на компании, се одржа по првичните негативни наслови, но според канцеларот Фридрих Мерц, самитот резултирал со вкупно инвестициски обврски во вредност од 800 милијарди евра до 2028 година.

Соработката со Nvidia беше договорена на разговор меѓу Мерц и извршниот директор на компанијата, Џенсен Хуанг. Според пишувањето на Handelsblatt, сојузната влада има намера да придонесе сума во евроизнос од девет цифри за оваа кооперација. Мерц и Хуанг истакнаа дека комбинацијата од германско инженерско знаење и најсовремена технологија за вештачка интелигенција треба да даде трајна сила на економската основа на Германија.

Во проектот со Nvidia, поддржан од сојузната влада, се очекува да учествуваат околу десетина германски компании, меѓу кои Siemens, Audi и стартапот за вештачка интелигенција Black Forest Labs од Фрајбург им Брајсгау. Nvidia веќе соработува со Siemens во Ерланген на производство на уреди. Хуанг постојано нагласува дека податоците треба да се гледаат како национален ресурс, кој не треба да се извезува, туку да се користи за градење „национална интелигенција“. Nvidia соопшти дека во 2025 година инвестирала речиси една милијарда долари во Германија и дека има удел во бројни германски стартапи и компании.

Одделно, Amazon планира да инвестира околу 16 милијарди евра во Германија во 2027 година, што беше објавено на истиот самит. Една третина од тие средства се наменети за проширување на центрите за податоци на нејзиниот облак-провајдер AWS. Според Amazon, во Германија веќе работат околу 3.000 вработени во подружницата за облак-услуги AWS, а планираните 4,8 милијарди евра за AWS ќе се инвестираат главно во регионот на Франкфурт на Мајна.

Мерц ги повика компаниите во Германија да ги отворат своите индустриски податоци за вештачката интелигенција, со цел да се заштити конкурентноста на секторите како автомобилската индустрија. Тој оцени дека одржувањето на германската индустриска база е клучна предност во однос на другите економии. Во Берлин канцеларот изјави и дека „Германците се сметаат за вредни, легнуваат рано и стануваат пред изгрејсонце“, дека на одмор први излегуваат на плажа и ги поставуваат пешкирите уште пред појадок, како и дека кога се договараат рокови за испорака, тие ги почитуваат.

Според Меѓународниот монетарен фонд, изгледите за германската економија неодамна донекаде се подобрија — сега се очекува раст од 1,3 отсто во 2026 година, наместо претходно прогнозираните 0,7 отсто. Дали ќе се оствари дополнителен подем благодарение на инвестициите на американските технолошки гиганти, останува да се види.