Ново Нордиск“ се ребрендира во „Ново“ — обид за враќање на лидерската позиција на пазарот за лекови за слабеење

Данскиот производител на лекови „Ново Нордиск“ (Novo Nordisk), познат по лекот „Вигови“ (Wegovy), го менува своето име во „Ново“ (Novo). Компанијата смета дека пократкото име ќе помогне подобро да допре до потрошувачите во конкуренцијата со ривалот „Ели Лили“ (Eli Lilly), пренесува Yahoo Finance.

Оваа одлука доаѓа во момент кога извршниот директор Мајк Даустар (Mike Doustdar) работи на заживување на компанијата, која ја загуби лидерската позиција на пазарот за лекови за слабеење што самата го создаде, отстапувајќи ја на „Ели Лили“.

Од компанијата соопштија дека ребрендирањето го означува почетокот на нејзиното следно поглавје. Новиот корпоративен идентитет со единственото име „Ново“ има цел компанијата да биде препознатлива и доследна во начинот на кој допира до луѓето. Името „Ново Нордиск“ е резултат на спојување од 1989 година меѓу две дански компании чии корени датираат од почетоците на производството на инсулин во Скандинавија во 1920-тите — „Нордиск Инсулинлабораториум“ и „Ново Терапеутиск Лабораториум“. Компанијата ќе го користи името „Ново“ — што на латински значи „ново“ — во секојдневното работење, но глобално ќе го задржи „Ново Нордиск“ како правно име. Освежен е и логотипот, при што е задржан бикот Апис од древниот Египет, кој е дел од брендот повеќе од еден век, но сега ќе гледа надесно наместо налево.

„Тие сакаат да сигнализираат промена на насоката, не само надворешно туку и внатрешно“, изјави Ед Корбет (Ed Corbett), експерт за бренд-стратегија во консултантската фирма „Брендинг Сајенс“ (Branding Science). Според него, ребрендирањето е изјава за намера дека „Ново“ сака да остави зад себе тежок период, но промената на името сама по себе нема да биде крајно решение.

Компанијата соопшти и дека во иднина ќе ја нагласува конкурентноста во својата корпоративна култура, додавајќи дека се потребни нови однесувања и начини на работа за да се води на пазар што е побрз, поконкурентен и сè повеќе управуван од потрошувачите. Некои аналитичари сметаат дека пазарот за лекови за слабеење, особено сегментот на таблети, наликува на пазарот на производи за здравствена заштита на потрошувачите, за разлика од конвенционалните лекови на рецепт. „Ново“ минатиот месец соопшти дека има корист од силниот моментум на таблетата „Вигови“, со повеќе од 5 милиони рецепти од нејзиното лансирање во јануари, и поради тоа ја подигна прогнозата за целогодишната продажба и оперативната добивка. Сепак, некои инвеститори се загрижени за развојниот тек на лековите на компанијата по разочарувачките податоци за нејзиниот лек од следната генерација за слабеење и дијабетес „КагриСема“ (CagriSema), како и за експерименталниот кардиоваскуларен лек.