Нова француска награда за книги напишани со помош на вештачка интелигенција

Оваа недела беше лансирана нова книжевна награда во Франција наменета за дела создадени со помош на вештачка интелигенција. Наградата „Prix Pascal de Littérature IA“ повикува на доставување ракописи кои се напишани во соработка со алатки на вештачка интелигенција, а на победникот му се ветува објавување на делото.

Според правилата на конкурсот, учесниците треба да достават необјавен ракопис со должина меѓу 10.000 и 50.000 зборови, заедно со информација за тоа кој модел на вештачка интелигенција и кој промпт биле користени за генерирање на текстот. Дозволени се сите големи јазични модели, вклучително ChatGPT, Claude, Gemini и LLaMA. Учесниците можат да бидат од каде било во светот, но пријавите мора да бидат доставени на француски јазик.

Наградата го носи името на Блез Паскал, француски полимат кој помогнал во изумувањето на еден од првите механички калкулатори и кој исто така пишувал теолошки текстови, меѓу кои и „Pensées“, кои папата Франциск ги пофалил за нивната „филозофска длабочина и литературен шарм“. Иако условите бараат фикциско дело, наградата наведува и дека доставените текстови треба да помогнат во решавање на етички, социјален или еколошки проблем што ја загрозува човештвото.

Наградата ја основале Филип Родригес, Албен Сервијан и Жил Ментре, сите тројца претприемачи во технолошката област. Родригес е основачки партнер во советодавната фирма за спојувања и превземања Avolta, а на веб-страницата на компанијата е опишан како „водечка фигура во европската крипто и блокчејн индустрија“. Сервијан е претприемач во дигитални медиуми и поранешен претседател на LGBTQ+ магазинот Têtu. Ментре е поранешен државен службеник со докторат по филозофија кој предава на Харвард и на Универзитетот Париз 1 Пантеон-Сорбона, а исто така е косновач на онлајн платформата за гласање Electis.

Лансирањето на наградата доаѓа по месеци контроверзии околу можното користење на вештачка интелигенција од страна на финалисти и победници на повеќе книжевни награди оваа година, вклучително наградата за краток расказ на Комонвелтот, наградата Caine и „Prix Goncourt“, најпрестижната француска книжевна награда. Пријавите за „Prix Pascal“ се отворени од вторник преку веб-страницата на наградата и ќе бидат затворени на крајот на ноември. Пред објавувањето на победникот на почетокот на декември ќе биде составен потесен избор од 10 дела. Жирито ќе го сочинуваат пет или шест писатели, критичари, новинари, филозофи и издавачи, чии имиња ќе бидат објавени на почетокот на ноември.