Муцунски и Петрова денеска на билатерална средба во Софија на маргините на Самитот за Коридорот 8

Министрите за надворешни работи на Македонија и на Бугарија, Тимчо Муцунски и Велислава Петрова, денеска ќе се сретнат во Софија, на маргините од Меѓународната конференција за развојот и стратешкото значење на Паневропскиот коридор 8. Средбата е официјално потврдена, а како што вчера информираше премиерот Христијан Мицкоски, форматот и начинот на нејзиното одржување дополнително ќе бидат утврдени.

Премиерот Мицкоски вчера изјави дека во текот на денот е добиена официјална потврда за билатерална средба, а форматот и начинот дополнително стојат во дипломатската нота дека ќе бидат договорени. „Така што утре ќе има билатерална средба, ќе видиме во кој формат и како ќе изгледа таа средба, дали ќе биде pull-aside, дали ќе биде билатерална на маргините на Самитот за Коридорот 8. Сепак е ова мултилатерален настан, да видиме како тоа домаќинот ќе го организира“, изјави Мицкоски.

За пораките што ќе бидат испратени на средбата, премиерот истакна дека во фокусот ќе биде потенцирањето дека само со дијалог може да се надмине моменталната состојба. „Нашите пораките се јасни, дека само со дијалог можеме да дојдеме до решение од оваа состојба во којашто во моментот се наоѓаме, дека ние сме за добрососедски односи и ние сакаме што побргу да ја реализираме нашата стратешка цел, да бидеме дел од Европската Унија, нешто што многу одамна го заслуживме“, рече Мицкоски.

Иницијативата за средбата произлезе за време на неодамнешната посета на претседателката на Европската комисија, Урсула фон дер Лајен, на Скопје. На заедничката прес-конференција со Фон дер Лајен, Мицкоски порача дека Европската Унија би требало да се вклучи во разговорите меѓу Македонија и Бугарија и да помогне во создавање услови за одржливо европско решение во кое договореното ќе биде јасно, а обврските ќе важат за сите. Премиерот изјави и дека од претседателката на Европската комисија добил совет како еден од чекорите за приближување на ставовите да биде токму престојната средба.

Уште истиот ден, Муцунски испрати дипломатска нота за иницирање средба со неговата бугарска колешка Петрова, во обид да се поттикне процесот за надминување на пречките и бугарската блокада на македонската евроинтеграција. Бугарското Министерство за надворешни работи по оваа информација потврди дека шефовите на дипломатиите на двете земји ќе имаат можност да се сретнат на маргините на Министерската конференција, а македонското Министерство за надворешни работи и надворешна трговија потврди дека е побарана средба меѓу министерот за надворешни работи и надворешна трговија Тимчо Муцунски и неговата бугарска колешка Велислава Петрова.

Средбата доаѓа во период кога македонската евроинтеграција е блокирана поради нерешените прашања меѓу Скопје и Софија, а македонската влада повеќепати ја истакна својата определба за дијалог како единствен пат кон надминување на пречките. Официјална Скопје смета дека само преку директни разговори, со поддршка на европските институции, може да се создадат услови за одржливо решение кое ќе ги обврзува сите страни.

Денешната средба во Софија се одржува на маргините на меѓународен настан посветен на развојот и стратешкото значење на Паневропскиот коридор 8, кој претставува значајна транспортна и инфраструктурна врска меѓу регионите. Токму мултилатералниот карактер на конференцијата е причината поради која форматот на билатералната средба сè уште не е прецизно дефиниран, односно останува да се утврди дали таа ќе се одржи како кратка средба на маргините или како целосна билатерална средба.

Од македонската влада претходно беше нагласено дека очекувањата од разговорот се фокусирани на потребата од дијалог и на приближување на ставовите, со цел да се отвори патот кон европската интеграција на земјата. Премиерот Мицкоски вчера потенцираше дека станува збор за мултилатерален настан и дека конечниот формат на средбата зависи и од организацијата на домаќинот.

Средбата на шефовите на дипломатиите на Македонија и Бугарија претставува прв директен контакт на ова ниво по иницијативата што произлезе од посетата на претседателката на Европската комисија на Скопје, а нејзиниот исход ќе биде следен и од европските институции, кои повеќепати изразија подготвеност да помогнат во создавањето услови за напредок во односите меѓу двете земји.