Митрополит Пимен во Осло се сретна со претставници на исламската заедница и одржа духовно предавање пред македонските верници

Митрополитот Европски Пимен, при својата посета на Норвешка, оствари средба со македонскиот амбасадор во Осло, Дритон Кучи, а потоа го посети и џамијата и исламскиот центар на Албанците од Македонија во норвешкиот главен град, каде што разговараше со претставници на исламската верска заедница. Посетата се случи во контекст на градењето пријателски односи и зачувувањето на духовниот идентитет на македонските иселеници, соопшти Европската епархија на Македонската православна црква – Охридска архиепископија.

На средбата во Амбасадата на Македонија во Осло биле разменети мислења за значењето на духовното поврзување на македонските иселеници и за можностите за унапредување на соработката во интерес на македонската заедница во Норвешка. По посетата на амбасадата, митрополитот Пимен, заедно со архиерејскиот заменик, протопрезвитер-ставрофор Блажо Кожарски, директорот на Агенцијата за иселеништво, Горан Ангелов, директорката на Комисијата за односи со верските заедници и религиозните групи, Оливера Трајковска, и претставници на Македонската православна црква во Норвешка, го посетил исламскиот центар на Албанците од Македонија во Осло.

„Различностите нè збогатуваат, а верата, почитта и љубовта кон ближниот нè обединуваат“, се наведува во пораката на Европската епархија, со повик ваквите средби да придонесат за продлабочување на пријателството, братството и мирот меѓу луѓето и верските заедници. Од Европската епархија ја истакнуваат важноста на меѓуверскиот и меѓукултурниот дијалог, заемното почитување и соработката меѓу верските заедници.

Гостите во исламскиот центар биле пречекани од претседателот на џамијата, Фатмир Шабани, претставникот на Исламската верска заедница, Фарук Терзиќ, и имамот Берат Хешани. Во текот на посетата, македонската делегација имала можност да се запознае со работата и искуствата на исламскиот центар, кој веќе три децении претставува духовно и заедничко собиралиште за верниците. Македонската православна црква во Норвешка, пак, е основана пред три години и претставува духовен дом за православните верници од македонската заедница во земјата.

Претходно, митрополитот Пимен одржа предавање за духовноста пред членовите на македонската црковна заедница во Осло, каде зборуваше за значењето на Светата Литургија и Светата Причест во животот на православните христијани. Во своето духовно слово, тој ја истакна Литургијата како темел на духовниот живот, место на заедништво со Бога и со ближните, при што посебен акцент беше ставен на значењето на заедништвото и на духовната врска меѓу верниците.

Посетата на митрополитот Пимен на исламскиот центар и на македонската амбасада во Осло се вклопува во пошироките напори на Европската епархија за негување на меѓуверскиот дијалог и за поврзување на македонските иселеници во Норвешка, каде што живее и работи македонската заедница. Со средбата со претставниците на исламската верска заедница, како и со духовното предавање пред православните верници, митрополитот Пимен испрати порака за соживот, почит и соработка меѓу различните верски заедници, што, како што беше нагласено, придонесува за продлабочување на пријателството и мирот меѓу луѓето.