Мицковски: Едномесечни судски одлуки во познати случаи покажуваат дека нема независно судство

Политичкиот аналитичар, советник, колумнист и новинар специјализиран за надворешно-политички прашања, Ивор Мицковски, упати остра реакција за случувањата во македонското правосудство, набројувајќи повеќе одлуки во крупни и јавноста добро познати случаи. Според него, сите тие одлуки се случиле во период од само еден месец, „додека е најтопло и луѓето се на одмори“.

Мицковски во својата објава се осврнува на одлуката на Апелациониот суд во предметот „Талир 2“, во кој поранешниот премиер Никола Груевски беше ослободен од обвинението. Како што посочува тој, со оваа одлука ВМРО-ДПМНЕ си ја вратила Белата палата и другиот имот што биле замрзнати со години. „Апелација ја потврди ослободителната пресуда за поранешниот премиер Никола Груевски, кој беше обвинет во случајот ‘Талир 2’, со што ВМРО-ДПМНЕ си ја врати Белата палата и другиот имот што беа замрзнати со години“, пишува Мицковски.

Тој потоа се осврнува и на предметот за автобуската несреќа кај Ласкарци, откако Врховниот суд ја укина пресудата на Апелациониот суд и предметот го врати на повторно одлучување. „Падна пресудата за Ласкарци!!!“, реагира Мицковски во објавата.

Во истиот контекст, Мицковски го споменува и случајот со пожарот во дискотеката „Пулс“ во Кочани. За обвинетиот Дејан Јованов-Деко притворот е продолжен до 3 октомври, а Мицковски посочува дека и повеќе други обвинети во предметот веќе не се во затворски притвор.

Понатаму, тој ги наведува и поранешните претседатели на Фудбалската федерација на Македонија, Муамед Сејдини и Илчо Ѓорѓиоски, за кои посочува дека им било дозволено да се бранат од слобода по прифаќањето гаранции.

Мицковски во истиот контекст ги споменува и случаите со Марковски и градоначалникот на Карпош, Стевчо Јакимовски, чија правосилна пресуда беше укината од Врховниот суд и предметот беше вратен на повторно судење.

Во завршницата од објавата, тој изнесува и тешки обвинувања поврзани со постапките за Артан Груби и за пожарот во модуларната болница во Тетово, оценувајќи дека последните случувања покажуваат отсуство на независност на институциите. „Ние немаме власт и немаме опозиција, немаме никакво независно судство или законодавна власт. Имаме една единствена обединета мафија“, пишува Мицковски.

Станува збор за ставови и оценки на Мицковски за повеќе различни судски постапки, а дел од предметите што ги споменува се однесуваат на случаи што со години ја окупираат јавноста во земјата. Неговата реакција доаѓа во момент кога вниманието на јавноста е насочено кон работата на судовите и кон одлуките донесени во неколку високопрофилни случаи.