Мицкоски: Тврдењата дека Михаилова и нејзиниот адвокат легално ја преминале границата се апсолутна лага

Премиерот Христијан Мицкоски категорично ги отфрли тврдењата дека Ива Михаилова и нејзиниот адвокат легално ја преминале македонско-бугарската граница, нарекувајќи ги „апсолутна лага“ информациите што беа објавени во бугарските медиуми. На прес-конференција со претставници на компанијата „Кромберг и Шуберт“, тој порача дека и Михаилова и нејзиниот татко, кога-тогаш, ќе одговараат пред македонските институции.

Според премиерот, невистинито е тоа што бугарските медиуми го пласираа во јавноста, дека Михаилова заедно со нејзиниот адвокат поминала на регуларен граничен премин и дека таму биле поздравени и им се салутирало. „Апсолутно е невистина тоа што го емитуваа бугарските медиуми, односно го пласираа во јавноста, дека заедно со нејзиниот адвокат поминале на регуларен граничен премин и дека таму биле поздравени, дека им се салутирало и така натаму. Тоа претставува лага“, изјави Мицкоски.

Премиерот откри и нов детал за движењето на адвокатот, повикувајќи се на евиденцијата на граничните служби. Тој посочи дека последен пат, откако има евидентирано, а тоа е потврдено и од бугарската страна, адвокатот влегол на 28 септември, што не е точно тоа што тој го тврдеше. „Последен пат, откако имаме евидентирано, а е потврдено и од бугарската страна, адвокатот влегол на 28 септември, а не е точно тоа што тој го тврдеше“, рече Мицкоски.

Според премиерот, Михаилова била пренесена во Бугарија надвор од законските процедури, а полицијата веќе работи на утврдување на околностите. „Можам да потврдам дека на нелегален начин е пренесена во Бугарија. Министерството за внатрешни работи истражува и ќе дојдеме до сознание на кој начин е однесена“, нагласи тој.

Мицкоски упати критики и до бугарското политичко раководство, оценувајќи дека случајот се користи за политички притисок. „Жалам што политичкото водство во Бугарија се обидува на овој начин да покаже политички мускули, а не ја сфаќа штетата што самата си ја прави на меѓународен план. Тоа е нивна одлука. Тие избрале ваква политика“, изјави премиерот.

Одговарајќи на обвинувањата на опозицијата дека заминувањето на Михаилова во Бугарија било однапред договорено, Мицкоски рече дека таквите тврдења се неосновани. Тој ги отфрли шпекулациите дека постоел претходен договор за нејзиното заминување, нагласувајќи дека намерата на ваквите обвинувања е да се создаде политички притисок.

Премиерот остана цврст во ставот дека институциите ќе ја утврдат целосната вистина за случајот и дека никој нема да биде заштитен од одговорност. Тој потврди дека Министерството за внатрешни работи интензивно работи на случајот и дека јавноста навремено ќе биде информирана за сите сознанија до кои ќе се дојде во истрагата.