Мицкоски: Разгледуваме проширување на евтината дневна тарифа и нови поевтинувања на горивата

Премиерот Христијан Мицкоски изрази целосна согласност со клучните ставови и енергетските анализи што ги изнесе претседателот на Регулаторната комисија за енергетика (РКЕ), Ацо Ристов, во интервју за 4ТВ, потврдувајќи дека власта и регулаторните тела делат идентични погледи за тарифната политика, цените на нафтените деривати и стабилноста на енергетскиот систем во пресрет на грејната сезона.

Една од клучните точки во кои премиерот јасно застана зад експертските тези на претседателот на РКЕ е потребата од прилагодување на моделот на дневната евтина тарифа за струја поради новата реалност создадена со фотоволтаиците. Ристов претходно во своето интервју појасни зошто актуелниот систем бара корекции, оценувајќи дека сегашниот модел е „превртен малку на глава“ бидејќи евтината тарифа е навечер кога струјата на берзите е најскапа. Тој објасни дека со хиперпродукцијата на фотоволтаиците преку ден има вишок или евтина енергија, додека навечер енергијата треба да се произведе од базни извори или да се увезе, што ја прави скапа.

Според Ристов, овие работи мора да се усогласат во корист на граѓаните, при што тој предложи неколку можни решенија — намалување на ноќниот период, зголемување на дневниот или проширување на евтината тарифа за викендите. На ова директно се надоврза и премиерот Мицкоски, потврдувајќи ја истата теза од позиција на стручњак и порачувајќи дека во одредени периоди од годината проширувањето на дневната евтина тарифа можеби ќе биде попродуктивно за граѓаните отколку сегашниот модел, но конечната одлука ќе ја донесе Регулаторната комисија по нивните анализи.

Премиерот се согласи и со оценките на Ристов за стабилноста на пазарот со нафтени деривати и ефектот од владините мерки со кои Македонија одржува најниски цени во регионот. Претседателот на РКЕ во интервјуто нагласи дека една од мерките со кои Македонија успева да има поевтини нафтени деривати е пуштањето на продуктоводот од Солун до Скопје, со што се стабилизираше транспортот, како и одлуките на Владата за намалување на делот од акцизата и намалувањето на ДДВ-то за дизелот од 18 на 10 отсто. Без овие мерки, како што посочи Ристов, дизелот денес би чинел меѓу 125 и 126 денари.

Мицкоски се надоврза со нова позитивна вест за потрошувачите, изјавувајќи дека според анализата на берзите од минатата недела очекува следната недела да има ново поевтинување на дизелот и бензинот. Со тоа, премиерот ја потврди линијата на РКЕ дека регулаторните анализи и владините мерки продолжуваат да даваат резултати на пазарот со горива, додека истовремено се разгледува можноста за дополнително прилагодување на тарифниот модел за електрична енергија во интерес на граѓаните.