Мицкоски: Потврдениот кредитен рејтинг од „Фич“ е уште една лоша вест за опозицијата
FinPortal.mk · 13.9.2026 г.
Премиерот Христијан Мицкоски денеска изјави дека потврдувањето на кредитниот рејтинг на земјата од страна на реномираната кредитна агенција „Фич“ претставува уште една лоша вест за опозицијата, која, како што рече, тажи и жали затоа што Македонија оди напред. Изјавата Мицкоски ја даде по посетата на Велес, одговарајќи на новинарски прашања. Според премиерот, опозицијата веќе три години води кампања со тврдења дека секоја година земјата само што не банкротирала, дека буџетот бил без пари, економијата назадувала и така натаму. Тој нагласи дека одговорите на тие тврдења стигаат од сите страни — од Светска банка, од Меѓународниот монетарен фонд, а сега и од реномирани кредитни агенции како што е „Фич“. „Така што имам лоша вест за опозицијата, а добра за граѓаните дека како Влада остануваме максимално посветени на подобрување на стандардот на граѓаните. Тоа е наша цел и тоа ќе го правиме преку сериозно засилена економска активност“, изјави Мицкоски. Тој додаде дека она што го прави опозицијата го анализира и го става во делот на политички ПР, оценувајќи дека таа нема кредибилитет бидејќи, како што рече, седум години го крадела народот, ја распродавала Македонија, ја понижувала и ја омаловажувала, а сега мисли дека тоа некој преку ноќ ќе го заборави. „Мислам дека повторно го потценуваат сопствениот народ и играат на картата на кратка меморија. Тоа нема да се случи“, рече Мицкоски. Според него, не е сè совршено и има работи што треба да се корегираат и да се поправат, но, како што оцени, сите ќе се согласат дека денеска е многу подобро отколку пред три години. Премиерот наведе дека нема банди, нема фудбалчиња, нема рекетирање, нема криминалци кои царуваат по улиците, нема марихуана економија и нема распродавање на националните интереси. Сето тоа, според него, е многу поразлично од она што се случувало кога била претходната Влада на СДСМ. Тој потсети и на одбележувањето на 35-годишнината од независноста, за кое рече дека било многу поразлично од она во 2020 година кога, как