Мбапе: Со години сум најдобар на светот, никој немаше подобра сезона од мене

Францускиот фудбалер Килијан Мбапе продолжува со својата кампања за освојување на „Златната топка“, наградата што ја доделува списанието „Франс фудбал“ за најдобар играч во светот. Во мини-интервју објавено од „Лекип“, ѕвездата на Реал Мадрид изрази цврсто уверување дека токму тој заслужува да ја добие оваа престижна награда, и покрај тоа што оваа сезона не освоил ниту еден тимски трофеј. Главна и практично единствена тема на разговорот беше „Златната топка“.

Мбапе истакна дека секогаш верувал оти „Златната топка“ треба да му припадне на навистина исклучителен играч. Тој призна дека тимскиот аспект е важен, бидејќи фудбалот е тимски спорт, но потсети дека ова е индивидуална награда. Според него, неговата визија за оваа награда е иста како во ерата на Лионел Меси и Кристијано Роналдо, кога никогаш не им се доделувала на обични играчи, туку на оние кои се исклучителни. „Мислам дека оваа година бев различен од другите. Затоа верувам дека можам да ја освојам“, изјави Французинот.

Како главен аргумент во својата кампања, Мбапе го наведе фактот дека бил најдобар стрелец во сите натпреварувања во кои настапил: во Ла Лига, во Лигата на шампионите и на Светското првенство. Тој дури стана и најдобар стрелец на сите времиња на Светските првенства кога се бројат сите првенства. „Да се биде најдобар стрелец во историјата на Светските првенства е нешто што се памети. Да се биде најдобар стрелец на сите најважни натпреварувања каде што играат најдобрите фудбалери — не знам дали некогаш е постигнато“, рече тој.

На забелешките дека не освоил никакви трофеи, Мбапе одговори со прашање дали некогаш постоел играч што ја освоил „Златната топка“ со 100 отсто од гласовите. „Не. Тоа значи дека секогаш има некој што мисли дека тој играч не ја заслужил“, смета напаѓачот. Тој додаде дека секогаш тргнува од принципот дека историскиот успех мора да се наградува и дека кога ќе се погледнат аргументите и натпреварувањето, ако ја освои наградата, тоа не би била неправедна одлука.

Францускиот репрезентативец откри и дека можеби веќе требало да го има трофејот во својата колекција. „Со години се сметав за најдобар играч на светот. Не видов ниту еден играч подобар од мене“, изјави Мбапе. Тој потсети дека кога Меси ќе пристигнел на церемонијата и ќе победел, велел дека најдобриот играч е на сцената и немал проблем со тоа. Истото го кажувал и кога победувал Кристијано Роналдо. „Што се однесува до другите, ги гледав и — дури и да ја имаа Златната топка, никогаш не сум сакал да бидам на нивното место“, заклучи тој.

Ова е втор пат оваа недела „Лекип“ да објави мини-интервју со ѕвездата на Реал Мадрид, а целта е јасна — засилување на кампањата пред изборот за најдобар фудбалер во светот. Мбапе останува цврсто убеден дека неговата сезона, исполнета со индивидуални признанија и голгетерски рекорди, е доволен аргумент за освојување на најпрестижната индивидуална награда во фудбалот.