Мбапе: Мојата кариера ја оценувам со чиста десетка, никогаш не ми беше здодевно

Францускиот фудбалер Килијан Мбапе смета дека има одлична кариера и дека неа ја оценува со највисока можна оценка. Мбапе беше награден од француското списание „Onze Mondial“ како најдобар играч на сезоната во Европа, а Французинот е во конкуренција и за најдобар во гласањето на „France Football“, односно за „Златната топка“.

Мбапе ја започна својата професионална кариера во Монако, пред да замине во Пари Сен Жермен, а потоа и во Реал Мадрид. „Ја оценувам мојата кариера со чиста десетка. Кариерата се живее во сите нејзини детали, и во добрите и во лошите моменти. Првото нешто што го паметам не се головите што ги постигнав или титулите што ги освоив, туку фактот дека во текот на овие 10 или 11 години никогаш не ми беше здодевно. Не го третирав она што го доживеав како нешто обично, туку секогаш го живеев во сите детали“, изјави Мбапе.

Францускиот напаѓач додаде дека е свесен оти понекогаш може да погреши и дека тоа воопшто не го загрижува. „Оние кои мислат дека сум совршен очигледно немаат телевизија. Докажував одново и одново дека можам да грешам, а тоа воопшто не ме загрижува. Мислам дека тоа е добра работа. Никој навистина не те познава преку телевизија, и затоа некои анализи понекогаш се целосно исклучени од реалноста“, рече Мбапе.

Мбапе минатата сезона не освои ниту еден трофеј, но беше најдобар стрелец на Светското првенство и во шпанската Ла Лига. Тој објасни и зошто неговите изјави често предизвикуваат реакции. „Ја познавам историјата и културата на мојата земја, па знам што можат да предизвикаат ваквите изјави. Кога го кажувам ова, тоа е затоа што верувам во тоа и затоа што ме мотивира. За да постигнете големи работи, не смеете да влезете во натпреварувањето верувајќи дека другите се способни да постигнат подобри перформанси од вас. Ова значи дека се ограничувате себеси и ставате бариера пред себе. Тоа е мојот менталитет“, заклучи Мбапе.