Марија Дукова со нови обвинувања: во лабораторијата на Клиника комшивки влегуваат преку ред, а системот за броеви „се укочил“ уште на почетокот

Марија Дукова, која претходниот ден јавно го сподели видеото за долгото чекање, пропуштањето пациенти преку ред и недоволната организација во лабораторијата на Клиника, повторно се вратила на истото место и повторно се соочила со истите проблеми. Како што раскажува таа, уште во 7 часот наутро била таму, но наместо подобрување, утрото донело нови привилегии за одредени пациенти.

Според нејзиниот опис, лабораторијата работи со број 21 и има пет шалтери, а официјалниот почеток на работното време е во 7:30. Во 7:30 почнала работата, првите пет пациенти влегле, а потоа екранот со броевите се укочил. Следувал целосен рестарт, принтерот почнал одново да ги печати броевите, а влегувањето се регулирало со довикување одвнатре — ситуација што Дукова ја опишува со иронична забелешка за „супер напредна технологија“.

Клучната сцена се случила кога Дукова ја прашала една госпоѓа дали кај неа се врши наплатата. „Не, јас не примам“, ми одговорила таа. Петнаесет секунди подоцна, таа ја препознала својата комшивка, со број 45, и ја повикала по име да влезе. Дукова реагирала: „Госпоѓо, нели рековте дека не примате пациенти?“ Одговорот бил: „Да, ама оваа ми е комшивка. Врата до врата сме. Како да не ја примам?“

Дукова продолжила: „Јас вчера ве снимав и го споделив видеото поради ваквото безредие, а вие денес го повторувате истото. Сакате ли и денес да ве споделам?“ На тоа добила реакција: „Ааа, вие ли бевте таа што снимаше? Како не ви е срам!“ Дукова одговорила: „Не ми е. Можеби вие треба да се засрамите поради привилегиите што ги давате на одредени луѓе.“

По оваа размена, информацијата дека Дукова ги снимала и споделила случувањата од претходниот ден се проширила со брзина на светлината. Таа наведува дека госпоѓата што потоа ја презела за наплата ѝ се извинила и ја замолила да ги разбере и нив — што Дукова вели дека го цени, но сака и тие да ги разберат пациентите.

Во својата објава Дукова прави јасна разлика меѓу техничките проблеми и одлуката некој да биде привилегиран. „Техничките проблеми ги разбирам. Притисокот врз вработените го разбирам. Но, едно е да имаш проблем со принтерот, а сосема друго е да одлучиш дека за некого правилата важат, а за некого не“, заклучува таа.

Нејзиното сведочење доаѓа еден ден по првичната објава за хаосот во лабораторијата, во која таа веќе ги посочи долгото чекање, пропуштањето пациенти преку ред и недоволната организација како главни проблеми со кои се соочуваат граѓаните. Втората посета, наместо да донесе промена, според нејзиниот опис, го повторила истиот образец — вклучително и привилегираното пуштање на комшивка преку ред, додека останатите пациенти чекале на својот број.