Манчестер Сити пред закана од одземање по 20 бода во три до пет сезони и без Лига на шампиони

Манчестер Сити би можел да се соочи со санкција што не вклучува исклучување од Премиер лигата, туку одземање од 20 до 25 бода во секоја од следните три до пет сезони, што практично би го оневозможило клубот да се квалификува во Лигата на шампионите во тој период. Овој предлог е еден од неофицијалните што се дискутираат во јавноста додека се очекува конечната одлука за казната на клубот поради кршење на финансиските правила, објави „Атлетик“.

Според новинарот Адам Крафтон, кој во подкастот на „Атлетик“ го пренесе разговорот со поранешен висок функционер од Премиер лигата, идејата за ваква мерка била презентирана уште во 2023 година, кога беше отворена аферата околу клубот. Функционерот предложил одземање на 20 до 25 бода од клубот во следните три до пет сезони, што, како што рече Крафтон, практично би им го оневозможило квалификувањето за Лигата на шампионите и, во најдобар случај, би ги оставило на средината на табелата во тој период.

Откако порталот објави информации за утврдената вина на клубот минатиот петок, во јавноста почнаа да се појавуваат предлози за можни санкции. Како што се наведува, еден од нив не вклучува исклучување од лигата, туку мерка што би го спречила клубот да игра во Лигата на шампионите со години. Ова засега е само еден од неофицијалните предлози што се дискутираат, а конечната одлука за казната за Манчестер Сити ќе биде донесена дури по завршувањето на целиот правен процес.

Каква и да биде казната, сигурно ќе следат жалби, па затоа се очекува долг процес. Доколку Манчестер Сити биде казнет на горенаведениот начин, тоа би претставувало огромен спортски и финансиски удар за клубот.

Сити континуирано игра во Лигата на шампионите од 2011 година, а најсилното европско натпреварување го освои во 2023 година. Со тоа што не би играл во Лигата на шампионите, клубот би го изгубил престижот да привлекува ѕвезди кои сакаат да настапуваат во најсилното натпреварување.