Манчестер сити ги отфрла наводите: „Не сме виновни за ништо, ништо не се промени

Претседателот на Манчестер сити, Калдун Ал Мубарак, им се обрати на навивачите на клубот откако британските медиуми објавија дека клубот е прогласен за виновен по 114 од вкупно 115 точки поврзани со наводно прекршување на финансиските правила на Премиер лигата. Според информациите на „Атлетик“ и други британски медиуми, независна комисија донела одлука по речиси тригодишниот процес, но конечната казна сè уште не е одредена, а Манчестер сити се очекува да поднесе жалба.

Ал Мубарак порача дека ставот на клубот останува непроменет и ги повика навивачите да не носат заклучоци врз основа на информациите што се појавија во јавноста. „Ве молам внимателно прочитајте ја изјавата што ја објавивме во петокот, како и онаа што ја објавивме во февруари 2023 година. Секој збор е важен и сè уште важи. Додека некои побрзаа да донесат свои заклучоци и додека околу нас има многу врева, ништо не се промени. И претходно заедно се соочувавме со предизвици и ги надминувавме. И понатаму има многу луѓе кои сакаат да го поткопаат напредокот на нашиот клуб. Нема да им ја дадеме таа можност. Не сме виновни за ништо“, порача претседателот на Сити во писмото до навивачите.

Клубот се повикува на својата официјална реакција по првите информации за одлуката на комисијата, во која нагласува дека постапката на Премиер лигата сè уште трае. Од Сити посочуваат дека постојат „значајни елементи кои допрва треба да бидат завршени“, а целиот процес се одвива под строги правила за доверливост. Англискиот клуб исто така наведува дека во изминатите осум години го почитувал правниот процес, очекувајќи Премиер лигата да дејствува како „независен, непристрасен и праведен регулатор“.

Од моментот кога беа покренати обвиненијата во февруари 2023 година, Манчестер сити ги отфрла сите наводи за неправилности и тврди дека поседува „обемен сет непобитни докази“ во прилог на својата позиција. Премиер лигата во февруари 2023 година го упати случајот на Манчестер сити до независна комисија поради низа наводни прекршувања на правилата, кои најголем дел се однесуваат на периодот од сезоната 2009/10 до 2017/18. Од вкупно 115 точки, 54 се однесуваат на наводно неприкажување точни финансиски информации, 14 на податоци поврзани со платите на фудбалерите и тренерите, пет на непочитување на правилата за финансиска одржливост, додека останатите точки се однесуваат на други наводни прекршувања.

Случајот претставува еден од најголемите правни предизвици во историјата на англискиот клуб и на Премиер лигата, а исходот од постапката може значително да влијае на иднината на Манчестер сити. Клубот останува цврсто на позицијата дека процесот не е завршен и дека сите наводи ќе бидат оспорени преку правните механизми што му стојат на располагање.