Македонија на „Хемпден Парк“ против Шкотска: судијата Оченаш и надежта за фудбалско чудо

Македонската фудбалска репрезентација задутре од 20:45 часот истрчува на култниот „Хемпден Парк“ во Глазгов, во рамките на 5-тото коло од Лига Б (Група Б1) во УЕФА Лигата на нации. По катастрофалната серија од пет порази по ред, избраниците на селекторот Гоце Седлоски се наоѓаат пред можеби најтешкиот испит во овој есенски циклус.

Кога тактиката на теренот не функционира, мотивацијата е во пад, а системот е заглавен во проблеми, можеби навистина ни е потребна помош од повисоки инстанци. УЕФА, свесно или не, направи урнебесен избор за овој натпревар — главен судија на мечот ќе биде Словакот Михал Оченаш. Во моменти кога македонскиот фудбал очајно бара излез од кризата, правдата на центарот ќе ја дели човек чие презиме фонетски се изговара буквално како најпознатата христијанска молитва „Оче наш“.

Искрено, со оглед на бледите изданија на нашата репрезентација во последно време, можеби колективно рецитирање на една молитва пред почетокот на мечот е единствената фудбалска стратегија што ни преостана. Се надеваме само дека господинот Оченаш ќе има милост кон нашите момци.

Домаќинот исто така не цвета од убавина и форма. Шкотланѓаните, предводени од селекторот Себастиен Покоњоли, имаат само една победа во последните пет меча. Сепак, нивниот ростер е исполнет со докажани премиерлигашки имиња. Искусниот Енди Робертсон, моторот на средината Џон Мекгин и креативецот Били Гилмур ќе бидат огромна закана за нашиот гол.

Историјата на меѓусебни дуели вели дека овие две нации се прилично изедначени — во досегашните три натпревари, двете селекции имаат по една победа, покрај едно реми. Тоа е дополнителен аргумент дека на „Хемпден Парк“ не сме однапред поразени, иако формата во моментов не е на наша страна.

И покрај сите остри критики кои ги упатуваме кон системот и федерацијата во изминатиот период, нашиот став останува непроменет — ние секогаш стоиме зад момците на теренот. Играчи како Столе Димитриевски, Елиф Елмас, Енис Барди и Матеј Гаштаров го носат товарот на една цела нација која е жедна за фудбалска радост.

Овие момци во минатото покажаа дека знаат како се игра против големи ривали на жешки гостувања. Без разлика на моментот, на „Хемпден Парк“ ќе биде потребна храброст, дисциплина и онаа искра која во минатото знаеше да донесе големи резултати. Ако на тоа се додаде и малку среќа — или, како што велат, милост од господинот Оченаш — македонскиот фудбалски народ можеби повторно ќе има за што да слави.