Македонија го задржа кредитниот рејтинг од агенцијата „Фич“, потврда за стабилните економски политики

Република Македонија го задржа кредитниот рејтинг што го оценува кредитната агенција „Фич“, соопшти министерката за финансии Гордана Димитриеска-Кочоска. Според неа, оваа одлука претставува силна потврда за конзистентноста на политиките што ги спроведува Владата и јасен сигнал дека треба да се продолжи по истиот пат.

„Ова за мене беше силна потврда за конзистентноста на политиките што ги спроведуваме и силен сигнал да продолжиме по истиот пат“, истакна министерката Димитриеска-Кочоска во објава на Фејсбук, пренесувајќи ја веста за задржаниот кредитен рејтинг.

Според министерката за финансии, стабилноста на јавните финансии и поттикнувањето на економскиот раст се основата на која ја темели економската политика што ја креира и спроведува Владата. Ефектите од тие политики, како што наведува, се гледаат и во економските показатели, а токму тие се основата за да се задржи кредитниот рејтинг на земјата.

Димитриеска-Кочоска потенцираше дека бројките се тие што ја отсликуваат фактичката состојба, и сега и во иднина. „Многупати сум напоменала дека бројките се тие што ја отсликуваат фактичката состојба и сега во моментов, но и кога на нив би се навратиле во иднина тие ќе ја отсликаат реалноста“, истакна министерката во својата објава.

Како што наведува, економскиот раст во првиот квартал 2024 година изнесувал 1,6 отсто, што била фактичката состојба од која се почнало. Носејќи одлуки кои, како што подвлекува, веќе дале ефект, придонеле да има континуитет на стапки на економски раст околу и над 3 отсто, а во последниот објавен податок за вториот квартал е забележана стапка на раст од 4,3 отсто. „Не зборуваме само за еден исклучително добар квартал, туку за континуитет на позитивните економски движења“, додава министерката.

Инвестициите, како што наведува Димитриеска-Кочоска, биле основата на која се темели економската политика. Само во вториот квартал од оваа година бруто инвестициите се зголемени за 16,5 отсто. „Тоа е особено важно затоа што покажува каков економски модел сакаме. Модел во кој инвестициите имаат поголема улога во создавањето на растот. Зад ова стојат забрзаната реализација на големите капитални и инфраструктурни проекти, проекти во општините за локален економски развој, но и инвестициската активност на домашниот приватен сектор“, наведува министерката.

Според податоците што ги изнесува министерката за финансии, градежништвото бележи раст од 21,9 отсто, индустријата 3,9 отсто, а преработувачката индустрија 4,1 отсто. Услужниот сектор расте за 2,4 отсто, со позитивни движења во повеќе дејности. Во вториот квартал извозот на стоки и услуги реално расте за 10,4 отсто.

Димитриеска-Кочоска додава дека овие резултати се особено важни за Владата бидејќи станува збор за остварувања постигнати во една голема глобална неизвесност, а имајќи предвид дека Македонија е мала и отворена економија. Токму ваквите показатели, како што заклучува министерката, ја потврдуваат основаноста за задржување на кредитниот рејтинг што го оценува кредитната агенција „Фич“.