Луда завршница во Валенсија: Леванте во 100. минута израмни на 3:3 против Севилја

Фудбалерите на Леванте и Севилја одиграа нерешено 3:3 во последниот натпревар од осмото коло од шпанскиот шампионат Примера, во натпревар што на градскиот стадион во Валенсија заврши по повеќе од 100 минути фудбал и со три гола постигнати во судиското надополнување на времето во второто полувреме.

Севилја поведе преку Урео во 13. минута и тоа беше единствениот гол постигнат во првото полувреме. Во второто полувреме, гостинот од Андалузија поведе со 2:0 во 54. минута кога мрежата на Леванте ја затресе Кореја, а само три минути подоцна Иван Ромеро намали на 2:1.

Судијата го продолжи натпреварот за осум минути и можеше да се почувствува дека ќе падне гол, што се случи брзо. Адриан де ла Фуенте, или скратено Адри, беше џелатот на Севилја, откако постигна гол во 92. минута што донесе ерупција од воодушевување меѓу домашните навивачи.

Следеше филмскиот крај на натпреварот. Севилја не сакаше да си оди дома поразена, па Исак Ромеро стана вистински херој откако постигна гол само три минути подоцна и во 95. минута им донесе ново водство на гостите. Севилја водеше со 3:2, но возбудата не запре тука.

Само две минути по херојскиот подвиг, Ромеро беше исклучен поради вториот жолт картон, што му даде предност на Леванте. Во 100. минута, Ндукве ги шокираше гостите од Севилја и му донесе израмнување на Леванте. ВАР ја провери целата акција, а откако утврди дека стрелецот не бил во офсајд, судијата го потврди голот и веднаш означи крај на натпреварот.

Со овој резултат, натпреварот заврши без победник, во еден од највозбудливите дуели досега во сезоната, во кој Леванте успеа да се спаси од пораз во самата завршница.