Левица: Власта ги игнорира барањата на студентите за повисок оброк, наместо тоа ветува суми под нивните очекувања

Партијата Левица остро ја критикуваше власта поради, како што наведуваат, непочитувањето на законската обврска за усогласување на субвенционираниот студентски оброк со растот на трошоците за живот. Според партијата, во изминатите три години студентите се оштетени за 6,5 милиони евра токму поради тоа што износот на оброкот не бил зголемен.

Од Левица потсетуваат дека предложиле измени на Законот за субвенциониран студентски оброк со кои износот би се утврдувал во висина од еден процент од минималната плата, а правото на субвенција би важело за сите студенти. Сепак, како што наведуваат, ДПМНЕ го одбил овој предлог, а Министерството за образование продолжило да го крши законот и да одбива да ја усогласи субвенцијата со растот на трошоците за живот.

„Власта не може да исполни ни законска обврска за една од ретките мизерни бенефиции што им ги обезбедува на студентите“, реагираат од Левица. Од партијата додаваат и дека министерката за образование Весна Јаневска до неодамна ги лажела студентите дека оброкот веќе е зголемен, а сега повторно ветува зголемување, без притоа да соопшти кога тоа ќе се случи.

Според Левица, во меѓувреме министерството ја пренасочува дебатата кон електронски ваучери и промени во системот, избегнувајќи го она што со закон е должно да го направи, односно да ја усогласи субвенцијата со инфлацијата. Од партијата оценуваат дека подеднакво бесрамни се и најавите на премиерот Христијан Мицкоски дека студентскиот оброк ќе изнесува 4.500 денари месечно, што е околу 170 денари дневно.

„Тоа е сума со која Владата очекува студентите да ги покриваат трошоците за исхрана во услови на постојан раст на цените. Ваквата најава е далеку од барањата на студентите и од предлогот на Левица за системско решение со кое субвенцијата ќе се врзе за минималната плата и ќе се усогласува со реалниот раст на трошоците за живот“, велат од Левица. Оттаму порачуваат дека наместо да лицитира со износи, Владата е законски обврзана итно да ја усогласи субвенцијата со инфлацијата, по три години игнорирање на оваа обврска.

Од Левица нагласуваат дека нема да дозволат ова прашање повторно да биде затскриено зад празни ветувања. Студентите, со поддршка на Левица, најавија поведување постапка против министерката Весна Јаневска пред Управниот суд, како и поднесување претставка до Народниот правобранител поради непочитувањето на нивните законски права.

„Ќе продолжиме да бараме одговорност од Министерството за образование сè додека законот не се спроведе, а студентскиот оброк не се усогласи со реалниот пораст на трошоците за живот“, порачуваат од партијата, со што ја затвораат својата реакција на актуелната состојба со студентската исхрана.