Левица: Само владин записник не е доволен за исплата на 300 милиони денари од Државна лотарија

Политичката партија Левица го оспори објаснувањето на директорот на Државна лотарија, Александар Климовски, дека за издвојување на 300 милиони денари е доволен само записник од седница на Владата. Од партијата оценуваат дека ваквото толкување претставува обид да се заобиколат законските процедури во акционерско друштво каде што одлуките за располагање со средствата мора да се носат согласно пропишаните правила.

Според соопштението на Левица, Климовски, на прашањето дали постои записник од Собранието на акционери со кој се одобрува ваквата операција, повторно се повикал на владината одлука, тврдејќи дека Владата настапувала во својство на акционер. Од партијата потсетуваат дека Државна лотарија е акционерско друштво во кое одлуките за располагање со средствата мора да се носат согласно законски пропишаните процедури и дека Владата како претставник на единствениот акционер не може само со налог да ги заобиколи тие процедури.

„Владата како претставник на единствениот акционер не може само со налог да ги заобиколи тие процедури, ниту да го замени потребниот акт за одобрување на исплатата од 300 милиони денари со повикување на владин записник“, се наведува во соопштението на Левица. Од партијата го цитираат и самиот Климовски, кој изјавил: „Дали ќе бидат одлуки формални или ќе бидат во нашиот записник, во текстот на записникот, тие нѐ обврзуваат“.

Според Левица, со ваквото објаснување директорот на Државна лотарија практично бара од граѓаните да прифатат дека формата, надлежноста и документацијата се споредни кога Владата ќе каже каде да одат парите. Од партијата сметаат дека за ДПМНЕ навиката да ги држи институциите под партиска контрола создава илузија дека може да ги заобиколува законите секогаш кога тоа ѝ е потребно на партијата.

„Кога институциите се третираат како партиски продолжени раце, а не како органи што располагаат со јавен капитал, не е чудно што сега, фатени во тесно, наместо со документи да одговорат на прашањата, се обидуваат да ја релативизираат сопствената одговорност“, се вели во соопштението на Левица.

Од партијата претходно ја коментираа и приказната за прославата од „нула денари“, оценувајќи дека по сите обиди таа да се продаде како таква, директорот на Државна лотарија сега се обидува да ја убеди јавноста дека за издвојување на 300 милиони денари е доволен записник од седница на Владата. Левица останува на позицијата дека располагањето со јавни средства во акционерско друштво не смее да се сведе на партиска одлука, туку мора да помине низ сите предвидени акти и процедури.