Левица на форумот на БРИКС во Москва: Отворање кон нови големи пазари за македонската економија

Делегација на партијата Левица, предводена од претседателот проф. д-р Димитар Апасиев, заедно со потпретседателот м-р Реџеп Исмаил-Хактан и членот на Президиумот м-р Александар Симонов, учествувала на форумот на БРИКС во Москва, каде остварила средби и разговори со меѓународни претставници за перспективите за продлабочување на политичката и економската соработка. Според соопштението на партијата, делегацијата на Левица на форумот се сретнала со Сергеј Красилников, член на Президиумот на Бизнис-советот на Евроазиската економска унија, како и со Ана Соловиева, менаџер за билатерална соработка во Руската унија на производители и потрошувачи.

Од Левица оценуваат дека БРИКС претставува еден од најзначајните центри на економско и геополитичко поврзување во современиот свет, обединувајќи држави со огромен производствен, технолошки, енергетски и трговски потенцијал. Во услови на забрзана трансформација на глобалната економија, како што наведуваат од партијата, оваа платформа отвора простор за нови меѓународни партнерства, инвестициски текови и пристап до големи пазари.

Во рамки на остварените средби, претставниците од Левица ја истакнале можноста за отворање на Македонија кон новите глобални економски центри, диверзификација на надворешно-трговските односи и искористување на потенцијалот за соработка во индустријата, енергетиката, инфраструктурата, земјоделството и современите технологии. Од партијата сметаат дека Македонија мора да ги препознае можностите што ги носи новата меѓународна економска архитектура и да развива надворешна политика водена од сопствените национални и економски интереси.

Според соопштението, за македонската економија проширувањето на меѓународните партнерства претставува можност за зголемување на извозот, зајакнување на домашното производство и отворање нови развојни перспективи. Од Левица нагласуваат дека учеството на делегацијата на форумот е дел од заложбите за развивање меѓународни контакти и отворање простор за политички дијалог во услови на сè поизразен мултиполарен свет.

Во соопштението се додава дека во време кога економската моќ и глобалното влијание се распределуваат меѓу повеќе центри, Македонија има интерес да ги проширува своите дипломатски и економски хоризонти, наместо да ги ограничува можностите за меѓународна соработка. Посетата и средбите во Москва, како што е наведено, се дел од низата посети и контакти на делегацијата на Левица во руската престолнина.