Левица бара интерпелација за министерката Божиновска: „ЕСМ е бунар без дно за богатење на соработници
Автор: Редакција на FinPortal.mk ·
Пратениците на Левица поднесоа барање до Собранието да изгласа интерпелација за министерката за енергетика Сања Божиновска, обвинувајќи ја дека не презела соодветни мерки за подобрување на состојбите во електроенергетскиот сектор и за заштита на интересите на граѓаните. Според партијата, надлежното министерство не успеало да ги реши проблемите во секторот, и покрај искуствата од претходните енергетски кризи. Пратеникот Амар Мециновиќ упати остри критики за досегашното работење на министерката. Тој оцени дека ова министерство дојде откако државата ги преживеа едни од најстрашните кризи на континентот и знаеше што требаше да преземе за да го заштити интересот на граѓанинот, но наместо тоа, според него, гледаме само премолчувања со кои се храни овој електроенергетски систем. „Ова министерство дојде откако ги преживеавме едни од најстрашните кризи на континентот, знаеше што требаше да преземе за да го заштити интересот на граѓанинот. Но гледаме само премолчувања со кои се храни овој електроенергетски систем“, изјави Мециновиќ. Тој се осврна и на финансиската состојба на државната компанија ЕСМ, тврдејќи дека таа има долгови од милиони евра и дека состојбите не се подобрени ниту по две години од доаѓањето на ВМРО-ДПМНЕ на власт. „Очигледно е дека никогаш не била ни намера да се консолидира ЕСМ. Го третираат само како бунар без дно за богатење на нивните соработници“, рече Мециновиќ. Со ваквите обвинувања, Левица ја доведува во прашање одговорноста на министерката за управувањето со енергетскиот сектор и бара пратениците да се изјаснат за интерпелацијата. Барањето доаѓа во момент кога состојбите во електроенергетскиот систем остануваат предмет на политички спор, а партијата инсистира на собраниска расправа за работата на министерството и за финансиската состојба на државната енергетска компанија.