Летачки автомобили во Кина: првите комерцијални летови можни веќе следното лето

Кинеската компанија XPeng соопшти дека нејзиното двоседно летачко возило со автопилот, чија цена изнесува 300.000 долари, би можело да биде подготвено за употреба веќе следното лето. Според извршниот директор Дели Џао, возилото ќе биде достапно за рекреативни летови во рурални средини, како и за потребите на итните служби во втората половина на 2027 година.

По десет години развој, вклучително и тестирања на летачки мотоцикли во базата на компанијата во Гуангџоу, кинеските цивилни воздухопловни власти го одобрија возилото за ограничена употреба. Кабината е со големина на автомобил „Фиат 500“, а возилото се крева во воздух со помош на шест пропелери на батерии, слични на дронови, и се управува со едноставен џојстик. Тоа може и автономно да лета до однапред програмирана дестинација, а Џао, кој е обучен пилот, тврди дека секој може да научи да го управува за пет минути.

Цената на летачкото возило вклучува и шесттркалезно комбе со големина на „Форд Транзит“, од чиј заден дел возилото се расклопува „токму како Трансформерс“, изјави Џао. Тој додаде дека делумно бил инспириран од летечките суштества во приказните за Хари Потер и од летачката даска на Зелениот гоблин од стриповите за Спајдермен.

„Светот во кој секој може да биде капетан наскоро пристигнува“, рече Џао на самитот Web Summit во Лисабон, каде прототипот на возилото привлече голем број посетители. Тој нагласи дека досега никој не е повреден при користење на возилото, кое, иако се опишува како автомобил, нема тркала и е поблиску до хеликоптерски дрон.

Џао посочи дека почетниот целен пазар се луѓе заинтересирани за нуркање, сурфање, возење надвор од патишта и летање. Коментирајќи го прототипот на летачки „Тесла“ што минатиот месец го претстави Илон Маск, Џао рече дека тој „навистина скока или отскокнува, а не лета вистински“. Возилото на XPeng може да лета на височина до еден километар над земјата, што е значително пониско од лесен авион без кабина под притисок, како што е „Цесна“.

Сепак, употребата на летачкото возило е ограничена. Тоа ќе може да се користи само во одобрени парковски подрачја во Кина и од итни служби што треба да стигнат до недостапни места. Дострелот на летот изнесува 30 километри, но наскоро треба да се удвои со зголемување на енергетската густина на батеријата на 400 киловати на килограм.

Појавата на ова возило е дел од пошироката иницијатива на Пекинг за развој на она што го нарекува „нисколетна економија“, која вклучува дронови и летачки автомобили, почнувајќи од летачки товар, потоа патници, и преминување од рурални средини кон градовите. Џао рече дека неговата компанија е една од околу 20 во Кина што работат на летачки возила. „Сите автомобили во иднина ќе добијат крилја и целиот транспорт ќе се премести од две димензии во три“, изјави тој, додавајќи дека потпишал договори со Обединетите Арапски Емирати и земји од Југоисточна Азија за развој на употребата на летачкото возило и дека компанијата има намера што поскоро да влезе на европскиот пазар.