ЛДП: Иселувањето ќе се интензивира, спротивно од оптимизмот на премиерот

Либерално-демократската партија (ЛДП) оценува дека иселувањето од Македонија во наредните години драматично ќе се интензивира, спротивно од она што го тврди премиерот. Во соопштение до јавноста, партијата наведува дека ваквиот тренд е директна последица на лошото владеење и на состојбите во клучните општествени системи.

Според ЛДП, додека премиерот шири, како што велат, розева пропаганда за наводен просперитет, суровата реалност и најновите PISA резултати покажуваат поразителна слика за Македонија. Партијата предупредува на загрижувачка елементарна и функционална неписменост кај младите и на целосен слом на образовниот систем.

Од ЛДП сметаат дека оваа општествена состојба директно се пресликува и во судството, каде што, како што наведуваат, одлуките станаа целосно неразбирливи за обичниот човек. Во државата, тврдат тие, за ситен криминал се одговара експресно, додека за најголемите коруптивни процеси постапките немаат завршница или завршуваат со ослободителни пресуди за кои дури и не се објавуваат пишани образложенија. Како примери за ваквата состојба партијата ги посочува случајот „Талир 2“ и седиштето на ВМРО-ДПМНЕ.

За да се види каде завршиле искрадените пари од џебот на граѓаните, од ЛДП велат дека не е потребно замислување или правни филозофии, туку доволно е само да се отворат очите во центарот на Скопје и да се погледне огромната камена палата со толку спратови и целиот плоштад пред неа.

Партијата оценува дека Македонија денес не се соочува со изолирани грешки, туку со невидена серија на скандали што го уништуваат секојдневието на граѓаните. Како потврда за тоа, од ЛДП наведуваат дека власта новата учебна година ја започнала со скандалозно преображение на наставните програми и со слушање црковни писма наместо наука, додека прославата на независноста ја претворила во коруптивен спектакл со приватизација на државни функции.

Според соопштението, генералната неказнивост гарантирана преку Кривичниот законик, законите заглавени со месеци и трагичниот, животозагрозувачки недостиг на лекови на Онкологија се само потврда дека системот е целосно заглавен. По истиот коруптивен модел, смета ЛДП, на сите им е јасно зошто бегаме од европските правила и зошто по истиот принцип паѓаат економијата, здравството и образованието.

Во вакви катастрофални околности, Либерално-демократската партија констатира дека, спротивно од празниот оптимизам на премиерот, иселувањето од Македонија не само што нема да запре, туку драматично ќе се интензивира во наредните години како директна последица на ова лошо владеење. Партијата поставува прашање кој нормален човек, млад професионалец или родител би останал да живее во земја каде што ги нема основните услови за здравје, правда и заштита на сопствените деца.

Од ЛДП додаваат дека единствените кои со задоволство ќе останат во ваква заглавена држава се луѓето од партиската елита на ВМРО-ДПМНЕ, кои, како што велат, се и единствените кои ја градат сопствената иднина врз грбот на оние кои си заминуваат.