Лапорта го предизвика Реал Мадрид: „Кога нашите ривали имаат проблем, им преквалификуваат еден терен и готово

Претседателот на Барселона, Жоан Лапорта, повторно испрати индиректна критика кон најголемиот ривал Реал Мадрид, овојпат на Генералното собрание на членовите на каталонскиот клуб. Во својот говор тој зборуваше за предизвиците со кои се соочува Барселона и за конкуренцијата во европскиот фудбал, при што испрати порака што очигледно беше насочена кон мадридскиот клуб.

„Клуб со големината на Барса секогаш има големи предизвици. Секогаш сакаме да бидеме подобри и тука нема место за самозадоволство. Историјата го бара тоа од нас. Мораме да продолжиме со процесот на раст, да бидеме храбри, креативни и иновативни. Знаеме дека се бориме против ривали кои се инвестициски фондови, клубови-држави. Нашите противници, кога имаат проблем, преквалификуваат еден терен и готово“, изјави Лапорта.

Оваа изјава се однесува на неодамнешната одлука на градските власти во Мадрид да одобрат промена на намената на 448.000 квадратни метри земјиште во спортскиот комплекс на Реал Мадрид во Валдебебас, што на клубот ќе му овозможи развој на нови комерцијални активности. Со тоа, како што нагласи првиот човек на Барселона, ривалот добива дополнителен простор за комерцијален развој, што според него е нерамноправна предност во однос на конкуренцијата.

Лапорта, сепак, не зборуваше само за ривалот. Тој изрази задоволство и од спортската форма на тимот предводен од Ханси Флик. „Навивачите на Барса се оптимисти бидејќи клубот се движи во вистинската насока. Како претседател го споделувам ова чувство на колективна радост, но морам да истакнам дека сега е време повторно да ги преземеме нашите одговорности и обврски. Одлуките што ги носиме денес се од суштинско значење за финансиската и институционалната стабилност, со цел проектот да биде долгорочен“, порача првиот човек на Барселона.

Лапорта посебно се осврна и на проектот „Еспај Барса“ и на дополнителното финансирање од 300 милиони евра потребно за завршување на работите на стадионот „Спотифај Камп Ноу“. „Ова ќе биде без преседан како извор на приходи. Се појавија околности кои ги забавија градежните работи, а тоа доведе и до зголемување на трошоците. Беа предвидени 800 интервенции на трибините, но извршивме многу повеќе. Воените конфликти, како војната во Украина, ни донесоа дополнителни трошоци за материјали и предизвикаа доцнења. Триста милиони евра ќе послужат за конечно завршување на Камп Ноу“, изјави Лапорта пред членовите на клубот.

Со овие пораки претседателот на Барселона испрати јасна порака дека каталонскиот клуб продолжува да се бори со ривалите и на институционален и на финансиски план, а неговата забелешка за „преквалификуваниот терен“ останува како директна стрелка кон Реал Мадрид.