КЗК даде зелено светло: Проекс Интернационал го презема Тинекс Маркет

Комисијата за заштита на конкуренцијата (КЗК) го одобри преземањето на малопродажниот бизнис на Тинекс Маркет од страна на косовската компанија Проекс Интернационал Л.Л.Ц, со што се отвора патот маркетите под брендовите Тинекс, Супер Тинекс, Тинекс Деликатес, Конто и Спот да преминат во нови раце. Со оваа одлука всушност се затвора едно 34-годишно поглавје во кое Владимир Тодоровиќ беше основач и сопственик на Тинекс.

Во решението на КЗК се наведува дека концентрацијата со која Проекс Интернационал има намера да стекне контрола врз Друштвото за трговија на мало Тинекс Маркет ДООЕЛ Скопје, иако потпаѓа под одредбите на Законот за заштита на конкуренцијата, нема да има за последица значително спречување, ограничување или нарушување на ефективната конкуренција на пазарот или на негов суштински дел. Како што се посочува во образложението, тоа особено се однесува на можноста за создавање или зајакнување на доминантната позиција на учесниците, поради што трансакцијата е оценета како согласна со одредбите на Законот за заштита на конкуренцијата во смисла на член 19 став (1) точка 2).

Според решението на КЗК, нема регулаторна пречка за реализација на договорената зделка, која на косовската компанија ѝ обезбедува влез на македонскиот пазар. Како што е наведено во документот, Проекс и компаниите од групацијата на која ѝ припаѓа немаат поврзани субјекти регистрирани во Македонија, ниту пак оствариле приходи на македонскиот пазар во 2025 година. Тоа значи дека компанијата купувач досега не била присутна на домашниот пазар на малопродажба.

Од КЗК потврдуваат дека на 2 јули годинава Тинекс-МТ како продавач и Проекс Интернационал како купувач потпишале писмо за намери и рамка за трансакцијата, односно ги утврдиле главните комерцијални услови и структурата на планираното преземање. Предмет на трансакцијата е малопродажниот бизнис на Тинекс-МТ, а Тинекс Маркет е новото правно лице кое е регистрирано на 14 јули годинава, или само 12 дена по потпишувањето на писмото за намери.

Според документот доставен до КЗК, ова друштво е предвидено да биде средството преку кое ќе се стекне и ќе се продолжи со работењето на малопродажниот бизнис. Во образложението се наведува дека Тинекс-МТ ДООЕЛ експорт-импорт Скопје, по потпишувањето на Писмото за намери, е субјектот преку кој се спроведува целата трансакција.

Одобрението на КЗК претставува последниот неопходен чекор пред формалното финализирање на зделката. Со неа, како што беше најавено, маркетите под брендовите Тинекс, Супер Тинекс, Тинекс Деликатес, Конто и Спот треба да преминат во сопственост на Проекс Интернационал Л.Л.Ц од Косово. Оваа трансакција означува и крај на сопственичката улога на Владимир Тодоровиќ, кој по 34 години го напушта бизнисот како основач и сопственик на Тинекс.

КЗК во своето решение јасно нагласува дека нема да биде нарушена ефективната конкуренција на пазарот на малопродажба во неспецијализирани продавници, односно маркети, што беше и главниот критериум за оценка на концентрацијата. Со оглед на тоа дека Проекс досега немаше никакво присуство на македонскиот пазар, регулаторот оцени дека влезот на нов играч нема да создаде или зајакне доминантна позиција која би го попречила нормалното функционирање на пазарот.

Со оваа одлука, македонскиот пазар на малопродажба добива нов сопственик со регионално потекло, додека брендовите што ги носат маркетите на Тинекс остануваат препознатливи за потрошувачите. Останува да се види како ќе се одрази промената на сопственоста врз секојдневното работење на продавниците и врз вработените, но регулаторниот процес за преземањето е завршен со позитивна оценка од КЗК.