Крогер бара спас во намалување на трошоците додека ривалите растат

Американскиот синџир за храна Крогер призна дека заостанува зад поголемите конкуренти и дека мора да работи поефикасно за да опстане на пазарот. Компанијата нема куповна моќ како Амазон, Волмарт и Коско, а за разлика од нив, Крогер мора да заработува токму од продажба на храна, наместо да ја користи како мамка за други производи или членства.

Извршниот директор Грегори Форан на прес-конференцијата по повод резултатите за вториот квартал изјави дека компанијата мора да биде немилосрдна кон трошоците. „Нашите тимови работат со поголема брзина и итност, а набавката и заштедите во овој квартал ги надминаа плановите“, рече Форан. Тој додаде дека намалувањето на трошоците е клучно не само за успех, туку и за опстанок. „Има уште работа во набавката, снабдувањето, продуктивноста и поедноставувањето. Секој долар што ќе го извадиме е долар што можеме да го реинвестираме во области што клиентите ќе ги видат. Така ова станува одржливо и за клиентите и за акционерите“, додаде тој.

Форан, кој првата година на функцијата ја помина во посети на продавниците на Крогер, смета дека има простор за подобрување во самата мрежа.

Тој истакна дека достапноста на производите на полиците достигнала највисоко ниво досега, а нарачките за подигање биле најдобри во историјата на компанијата. „Имаме можност да станеме и посилни трговци. Без разлика дали се работи за свежа храна или готови оброци, можеме подобро да им помогнеме на клиентите да одговорат на прашањето ‘Што за вечера?‘ и да создадеме возбуда околу одличните производи во нашите продавници. Кога го правевме тоа, клиентите одговорија. Природните и готовите оброци растеа значително над вкупната продажба“, рече Форан.

Управниот директор на ГлобалДата, Нил Сондерс, смета дека Крогер има значителна работа пред себе. „Крогер има огромен дострел и моќна економија на обем. Проблемот е што со години не успеа да ги искористи овие предности. Компанијата не беше доволно агресивна, ниту доволно прогресивна“, изјави Сондерс за РеталВајр. Според него, резултатот е дека Крогер станал безличен трговец од средниот пазарен сегмент кој не се разликува доволно и не победува ниту на цена, ниту на искуство, ниту на сопствена марка, ниту во е-трговијата како Волмарт.

За споредба, пазарната капитализација на Амазон изнесува 2,76 трилиони долари, на Волмарт 852,7 милијарди долари, а на Крогер 35,83 милијарди долари. Извршниот директор на Амазон, Енди Џеси, неодамна потврди колку голем бизнис со храна има компанијата. „Многу сум оптимист за храната. Мислам дека некои луѓе не сфаќаат колку голем бизнис со храна има Амазон денес. Ако ги погледнеме производите од средината на продавницата — производи за широка потрошувачка, конзервирана храна, фармацевтски производи, производи за убавина, навистина секојдневни неопходности — ако ги исклучиме Воли Фудс Маркет и Амазон Фреш, минатата година остваривме над 100 милијарди долари бруто продажба во нашиот бизнис со храна само од овие производи“, рече Џеси. Крогер, пак, во вториот квартал оствари вкупна продажба од 34,6 милијарди долари.

Волмарт, од своја страна, најави агресивен пристап кон цените. Главниот трговец на Волмарт САД, Џули Барбер, во јули изјави дека компанијата дополнително инвестира во цените со илјадници намалувања на производите што клиентите најмногу ги купуваат, вклучително говедско месо, свежо овошје и зеленчук и пијалаци. Форан потврди дека и Крогер бара нови начини да ги намали цените за своите купувачи, вклучително преку брендот Смарт Веј, со повеќе производи, поширока покриеност низ продавницата и подобра видливост и во продавниците и онлајн.