Конгресмен бара Фед да го преиспита пристапот на Хонгконг до доларска ликвидност

Претседателот на влијателна конгресна комисија во САД го повика Федералните резерви да ја разгледаат можноста за ограничување на пристапот на Хонгконг до механизмот за краткорочна доларска ликвидност, дознава CNBC. Конгресменот Џон Муленаар, републиканец од Мичиген, во писмо испратено до американската централна банка минатата недела побарал Фед да го преиспита пристапот на Хонгконшката монетарна управа до механизмот „Репo“ за странски и меѓународни монетарни власти (FIMA). Муленаар е претседател на Избраната комисија за Комунистичката партија на Кина.

Механизмот FIMA им овозможува на централните банки практично да позајмуваат долари од Фед, користејќи ги своите државни обврзници како колатерал. Тој е замислен како средство со кое владите во криза можат да дојдат до долари без да мораат да продаваат државни обврзници, што би можело да предизвика надолна спирала на цените. Хонгконг речиси и не го користел овој механизам од 2020 година, поради што непосредниот финансиски ефект од евентуално ограничување би бил релативно мал. Економистите предупредуваат дека ограничувањето на пристапот би можело да го намали и еден од механизмите што го зајакнуваат побарувачката за долари и американски државни обврзници.

Притисокот за ограничување на пристапот на Хонгконг до извор на доларска ликвидност доаѓа во момент кога Кина вложува напори да ја промовира својата валута, ренминбито, како алтернатива на доларот како основа на глобалниот финансиски систем. Односите меѓу САД и Кина остануваат напнати и покрај срдечниот тон на неодамнешната средба во Вашингтон меѓу претседателот Доналд Трамп и кинескиот лидер Си Џинпинг. Портпарол изјави дека Фед го примил писмото на Муленаар и планира да одговори.

Сепак, според Шехзад Кази, управен директор на истражувачката фирма China Beige Book, претседателот на Фед, Кевин Ворш, малку е веројатно да преземе чекор што би можел да се смета како мешање во политиката кон Кина во чувствителен момент. Кази оценува дека ова е пример за нови начини на кои Конгресот би можел да почне да ја наметнува својата улога во политиката кон Кина, а „многу кревкото примирје“ меѓу двете земји останува крајно ранливо.

Муленаар во писмото наведува дека Фед треба да го земе предвид „целосното демонтирање на правната и институционалната автономија што историски го разликуваше Хонгконг од континентална Кина и го оправдуваше неговиот преференцијален третман според американското право“. Тој смета дека Фед треба да ја разгледа оваа промена заедно со неодамнешните напори на Кина да ја зајакне својата валута како алтернатива на доларот. Народната банка на Кина во јуни лансираше своја верзија на механизмот FIMA на Фед, со цел да им овозможи на централните банки краткорочни заеми на кинески државни обврзници, а Хонгконг беше прв во тој процес.