Кејн пред продолжување на договорот со Баерн: „Сме многу блиску, прашање е на денови

Англискиот напаѓач Хари Кејн е на чекор до продолжување на соработката со Баерн Минхен, откако самиот потврди дека преговорите со баварскиот гигант напредуваат одлично и дека конечниот договор би можел да биде постигнат во наредните денови. Кејн, кој минатиот викенд не успеа да постигне гол против Борусија, на прес-конференцијата пред дуелот со Атлетико Мадрид зборуваше за својата иднина и изјави дека двете страни се многу блиску до договор.

Актуелниот договор на напаѓачот истекува на 30 јуни, а преговорите за продолжување траат веќе неколку месеци. Според изворот, остануваат да се усогласат уште некои детали, пред сè околу должината на новата соработка. „Мислам дека е прашање на денови. Имавме добри разговори во текот на викендот. Знам дека постојано велам дека сме блиску, но сега навистина сме многу блиску“, изјави Кејн.

Англичанецот пристигна во Минхен во летото 2023 година од Тотенхем, а не крие дека одлуката да ја продолжи кариерата во Германија била една од најважните во неговиот живот. „Преселбата во Баерн беше голем чекор во мојата кариера. Ќе ми беше лесно да останам во комфорна средина до крајот на кариерата, знаејќи дека секогаш ќе играм. Но, сакав да се предизвикам себеси и да напредувам. Баерн Минхен ми го промени животот, и на теренот и надвор од него. Преселбата во друга земја со моето семејство и начинот на кој бевме пречекани беа навистина неверојатни. Искрено, многу сум среќен што го направив тој чекор“, порача англискиот напаѓач.

Сè укажува дека Кејн и во наредниот период ќе биде предводник на нападот на баварскиот гигант. Неговата изјава пред дуелот со Атлетико Мадрид доаѓа во момент кога клубот ги финализира последните детали од новата соработка, а самиот фудбалер јасно стави до знаење дека преговорите се во завршна фаза и дека останува само формалното потпишување.