Јапонската централна банка пред најголемо покачување на каматните стапки во три децении
Јапонската централна банка (BOJ) најверојатно ќе ги покачи каматните стапки на 1,25 отсто на крајот од дводневниот состанок во петок, покажува анкетата на CNBC. Ваквиот потег би значел забрзување на циклусот на затегнување на монетарната политика, кој би бил побрз од шестмесечниот интервал што банката го применува откако започна со нормализација на политиката во март 2024 година. BOJ последен пат ги покачи стапките во јуни.
Околу 89 отсто од анкетираните респонденти изјавиле дека очекуваат покачување од 25 базични поени, наведувајќи ја повисоката инфлација, повисоките плати и притисокот од американската влада. Годишната стапка на инфлација во Јапонија во јули го достигна највисокото ниво оваа година, 1,9 отсто, поради зголемените трошоци за енергија предизвикани од војната во Иран. Во истиот месец реалните плати пораснаа за 2,4 отсто, седми месец по ред.
Американскиот министер за финансии Скот Бесент му порачал на гувернерот на BOJ, Казуо Уеда, да преземе „одлучни пазарни и монетарни чекори“ на состанокот на министрите за финансии и гувернерите на централните банки на Г20 претходно овој месец. Бесент подоцна на социјалните мрежи напишал дека разговарале за важноста на закотвувањето на инфлациските очекувања и избегнувањето прекумерна нестабилност на девизните курсеви.
„Администрацијата на Трамп ефективно го спречи секој потенцијален обид на владата на Такаичи да ја блокира Јапонската централна банка во покачувањето на каматните стапки“, изјавил Такахиде Киучи, извршен економист во Институтот за истражување Номура и поранешен член на одборот за политика на BOJ. „Следствено, Јапонската централна банка доби слободни раце да продолжи со покачувањето на стапките.
Членовите на одборот на BOJ исто така дале јастребови коментари, оставајќи ја отворена можноста за забрзано покачување на стапките. Анкетата на CNBC била спроведена од 9 до 14 септември меѓу 18 економисти и аналитичари. Меѓу оние со поинакво мислење, Јеспер Кол, експерт-директор во Monex Group, смета дека BOJ ќе покачи за 50 базични поени во „еден и готово“ потег. Карлос Касанова, висок економист за Азија во UBP, очекува BOJ засега да остане без промена, иако смета дека банката заостанува и на крајот очекува две покачувања од 25 базични поени на секои шест месеци.
На прашањето кои членови на одборот на BOJ најверојатно ќе се спротивстават на покачувањето, околу една третина од респондентите ги навеле Тојичиро Асада и Ајано Сато. Двајцата се сметаат за рефлационисти и биле именувани од премиерката Санае Такаичи претходно оваа година.
Што се однесува до јенот, околу 61 отсто од респондентите очекуваат тој во следниот месец да се тргува меѓу 155 и 160. Хомин Ли, висок макро-стратег во Lombard Odier, изјавил дека јастребовиот пресврт на BOJ ќе помогне јенот да остане посилен од 160. Но, зајакнувањето над 150 „нема да биде лесно“ бидејќи владините и деловните претставници ќе се спротивстават на „несоодветно“ брзото зајакнување на валутата, рекол тој.