Јанкуловски: Депозитите на граѓаните се заштитени, нема причина за паника
Автор: Редакција на FinPortal.mk ·
Заменик-министерот за финансии Николче Јанкуловски изјави дека депозитите и правата на граѓаните се заштитени согласно законските прописи и дека нема потреба од паника поради случувањата во банкарскиот сектор. Во својата објава, Јанкуловски објасни дека досега се воздржувал од јавни коментари бидејќи супервизијата и контролата на банките се во надлежност на Народната банка, а не на Министерството за финансии. Според него, одговорното постапување е неопходно за смирување и нормализирање на состојбите. Тој упати критики до политичките чинители кои, како што наведува, со неодговорни изјави и непроверени информации ја нарушуваат довербата на граѓаните во финансискиот сектор. Јанкуловски нагласи дека Народната банка располага со стручни кадри и законски механизми за контрола на банкарскиот систем, повикувајќи ги граѓаните да останат смирени и да се потпираат на проверени информации. „Доколку продолжат неоснованите напади врз правни субјекти во финансискиот сектор и ширењето дезинформации што можат да ја нарушат довербата на граѓаните, како Влада нема да останеме неми“, порача заменик-министерот, најавувајќи постапување во рамките на законските надлежности. Според Јанкуловски, одговорното постапување на институциите и воздржувањето од изјави што не се поткрепени со проверени факти се клучни за смирување на состојбите во банкарскиот сектор и за нормализирање на довербата на граѓаните.