Јаневска: Не ги влечете образованието и здравството во дневнополитичките пресметки

Министерката за образование и наука Весна Јаневска денеска од собраниската говорница упати апел до политичките партии да не ги користат образованието и здравството за собирање политички поени, откако пратеничката Сања Лукаревска од СДСМ побара одговор кога децата од училиштето „Киро Глигоров“ во скопски Центар ќе почнат да учат со физичко присуство и зошто доградбата не се изведувала за време на летото.

Јаневска оцени дека ваквото прашање претставува популизам и нагласи дека сите ученици за една недела треба да почнат да учат со физичко присуство, а организацијата на наставата ја прави директорката на училиштето. Таа потсети дека дел од децата во моментот имаат онлајн настава, но дека причината за тоа е обезбедувањето подобри услови за учење и постигнување подобри резултати.

„Не очекував од вас ваков популизам. Настава децата имаат, да, во дел имаат онлајн настава, затоа што им се обезбедуваат подобри услови за да учат, за да постигнуваат подобри резултати. Дали треба? Треба. Ако не градевме, ќе ме прашате зошто децата ви учат во две смени. Кога градиме, велите зошто градите, децата не можеле да учат, нели секојдневно ќе учат. За една недела сите ќе учат со физичко присуство“, рече министерката.

Според неа, вистинскиот проблем не е во градежните активности, туку во системот. „Проблемот е што не учат. Проблемот е што има проблем во системот и не ни учат и приоритет е ПИСА и приоритет е како да почнат да го совладуваат материјалот и како да ги научиме нашите наставници да им го пренесат знаењето“, изјави Јаневска.

Министерката повтори дека од собраниската говорница постојано ги повикува партиите да се обединат во областа на образованието и здравството, додека за сите други теми, како што рече, може да се расправа. „Овде нема проблем. Зошто правиме проблем таму каде што го нема само за популизам, за собирање лајкови и гласови. Гласови ќе собираме на добри проекти. И тоа така треба да биде. Еве ве молам, тргнете ги рацете од образованието и од здравството, суштински се за младите. Оти вака како што се последни, а ќе бидат уште полоши ако нешто не превземеме, вие знаете што ќе се случува во иднина. Ама не сум сигурна дека се грижите. Се грижите за во моментов да го постигнете рејтингот на вашата партија. Не се грижите за децата“, порача Јаневска.

Одговарајќи на забелешките на Лукаревска дека доградбата во училиштето почнала доцна, министерката објасни дека Министерството има коректни односи со општината, но дека проектот во архива е предаден на 18 мај, по што цел месец не бил закачен во системот, а откако е закачен поминале 40 дена за да се добие одобрување. „Барањето е закачено на 3 јуни, одобрено е на 28 јули. Ова е она што е реалност“, рече Јаневска, дополнувајќи дека има уште една реалност во комуникацијата со општината.

Расправата во Собранието покажа дека прашањето за динамиката на градежните работи во училиштето „Киро Глигоров“ не е само организациско, туку и политичко. Опозицијата инсистираше на одговор зошто доградбата не се реализирала во летниот период кога нема настава, додека министерката возврати дека ваквите прашања се поставуваат со цел собирање политички поени, а не заради суштинска грижа за учениците.

Јаневска потенцираше дека образованието и здравството треба да останат надвор од дневнополитичките пресметки и дека токму тие области се клучни за младите генерации. Според неа, доколку не се преземат конкретни чекори, состојбата во образовниот систем може дополнително да се влоши, а одговорноста за тоа не смее да се префрла на градежните активности што се спроведуваат со цел подобрување на условите за учење.

На крајот од своето обраќање, министерката уште еднаш апелираше до сите партии да ги тргнат рацете од образованието и здравството, нагласувајќи дека овие две области не смеат да бидат предмет на политичка расправа и собирање гласови, туку простор за заедничко дејствување во интерес на децата и на иднината на државата.