Јанев во Берлин: Македонската полиција и германската федерална полиција продлабочуваат соработка во борбата против транснационалниот криминал

Директорот на Бирото за јавна безбедност, Александар Јанев, во рамки на работната посета на Германската федерална полиција оствари билатерална средба со нејзиниот претседател, д-р Дитер Роман, соопшти Министерството за внатрешни работи. На средбата беа разгледани актуелните безбедносни предизвици и можностите за продлабочување на соработката меѓу двете полициски институции.

Централна тема на разговорот беше справувањето со илегалната миграција, тероризмот, криумчарењето мигранти, организираниот криминал и недозволената трговија со дрога. Притоа, посебен акцент беше ставен на навремената размена на информации и на заедничкото оперативно дејствување на двете полиции, што претставува основа за успешно справување со овие предизвици.

Посебно внимание на средбата беше посветено на зајакнувањето на капацитетите на македонската полиција, особено на граничната полиција. Како што беше наведено, тоа ќе се постигнува преку специјализирани обуки, размена на искуства и воведување современи технички решенија. Во тој контекст, беа разгледани и можностите за воведување електронски гранични порти, попознати како E-gates, како и за имплементација на системите на Европската Унија за гранична контрола.

На состанокот се разговараше и за унапредување на заедничките истражни тимови и оперативни работни групи, што би значело уште поцврста институционална поврзаност меѓу македонската и германската полиција во истрагите што ги опфаќаат двете земји.

Директорот Јанев изрази благодарност за континуираната поддршка од германската Влада во модернизацијата на македонската полиција. Таа поддршка, како што беше посочено, се реализира преку донации на возила, опрема, технички средства и специјализирани обуки, со што директно се зајакнуваат оперативните можности на македонските полициски службеници.

Во разговорите беше истакнато и значењето на вложувањето во човечките ресурси, знаењето и професионалниот интегритет на полициските службеници. Притоа, повторното отворање на Средното полициско училиште беше посочено како стратешка инвестиција во иднината на македонската полиција, бидејќи обезбедува континуиран и квалитетен кадар за потребите на службата.

На средбата беше потврдена заедничката определба за натамошно продлабочување на партнерството, за размена на информации и за координирано дејствување во справувањето со транснационалните безбедносни закани. Како што беше нагласено, Македонија е доверлив и активен партнер во европската безбедносна соработка, а преку партнерството со Германија продолжува да ги зајакнува своите капацитети и да придонесува кон поголема безбедност на граѓаните и побезбедна Европа.

Работната посета на Германската федерална полиција претставува дел од континуираните напори на македонското Министерство за внатрешни работи за продлабочување на меѓународната полициска соработка, особено со земјите-членки на Европската Унија, чии стандарди и системи македонската полиција постепено ги усвојува во своето работење.