Извозот на ветерни турбини од ЕУ порасна, увозот на соларни панели падна

Во 2025 година вредноста на увезените соларни панели во Европската Унија падна за 27,7 отсто, на 8,0 милијарди евра. Обемот на увозот се намали за 4,0 отсто, што укажува дека просечната цена на увезените соларни панели исто така паднала, соопшти Евростат.

Увозот на биогорива во ЕУ вредеше 2,7 милијарди евра, што е пад од 7,9 отсто во споредба со претходната година. И обемот на увозот се намали, за 11,6 отсто.

Од друга страна, вредноста на увезените ветерни турбини порасна за 40,6 отсто, на 0,7 милијарди евра, а обемот на увозот се зголеми уште поостро, за 69,0 отсто.

Кога станува збор за извозот, ЕУ во 2025 година извезла соларни панели во вредност од 0,5 милијарди евра. Вредноста на извозот се намали за 23,6 отсто, додека обемот порасна за 2,6 отсто.

Извозот на биогорива од ЕУ беше проценет на 1,0 милијарда евра, по пад од 45,9 отсто во вредност и намалување од 46,2 отсто во обем во споредба со претходната година.

Од трите групи производи, ветерните турбини имаа највисока извозна вредност (3,1 милијарда евра). Во споредба со претходната година, забележан е раст и во вредноста (10,8 отсто) и во обемот (9,5 отсто).

Во 2025 година, Кина беше далеку најголем добавувач на соларни панели, со удел од 98,6 отсто во целиот увоз, и продолжува да доминира во увозот.

Кај течните биогорива, Малезија го предводеше увозот со удел од 21,9 отсто, по што следат Соединетите Американски Држави (16,1 отсто), Аргентина (12,4 отсто) и Обединетото Кралство (12,3 отсто). Кина повеќе не е меѓу водечките трговски партнери, бидејќи увозот на биогорива од оваа земја падна од 24,2 отсто од вкупното во 2024 година на само 1,3 отсто во 2025 година, додека Малезија и Соединетите Американски Држави го зголемија својот извоз во ЕУ, од 15,3 отсто и 8,4 отсто во 2024 година, соодветно.

Во 2025 година, увозот на ветерни турбини најмногу доаѓаше од Кина (59,6 отсто) и Индија (22,2 отсто). Во споредба со 2024 година, Кина го зголеми својот удел од 41,3 отсто и ја замени Индија како најголем добавувач.