Извозот на електрични и хибридни автомобили од ЕУ достигна 64,7 милијарди евра во 2025 година

Трговијата на Европската Унија со електрични и хибридни автомобили бележи значителен раст во 2025 година. Според податоците на Евростат, увозот на овие возила достигна 45,1 милијарда евра, што е за 4 отсто повеќе во споредба со 2024 година, кога изнесувал 43,4 милијарди евра. Извозот, пак, порасна на 64,7 милијарди евра, што претставува зголемување од 10 отсто во однос на претходната година, кога вредел 58,7 милијарди евра.

Овој раст е уште поизразен кога ќе се спореди со 2017 година, кога електричните и хибридните возила учествуваа со само 10 отсто од вкупниот увоз на автомобили и со 3 отсто од вкупниот извоз. Во 2025 година, целосно електричните автомобили зафаќаа 20 отсто од увозот и 18 отсто од извозот, наспроти 0,8 отсто и 1,1 отсто во 2017 година. Приклучните хибриди претставуваа 17 отсто од увозот и 9 отсто од извозот, додека неприклучните хибриди учествуваа со 23 отсто од увозот и 14 отсто од извозот.

Производството на електрични и хибридни возила, исто така, бележи силен пораст. Од вкупно 12,6 милиони автомобили произведени во ЕУ во 2025 година, речиси 40 отсто биле хибридни или електрични, односно 4,8 милиони возила. Тоа е зголемување од речиси еден милион во споредба со 2024 година, кога биле произведени 3,9 милиони вакви автомобили. Вредноста на производството на електрични и хибридни возила изнесувала 139 милијарди евра, наспроти 123 милијарди евра претходната година.

Кина останува најголем партнер на ЕУ за увоз на електрични автомобили со 42 отсто од вкупниот увоз, по што следат Јужна Кореја со 27 отсто и Јапонија со 9 отсто. На извозната страна, најголеми партнери се Обединетото Кралство со 35 отсто, Соединетите Американски Држави и Норвешка со по 14 отсто.