Извозот и увозот на електрични и хибридни автомобили во ЕУ значително пораснаа во 2025 година

Трговијата со електрични и хибридни автомобили во Европската Унија значително порасна од 2017 година, кога електричните и хибридните возила учествуваа со само 10 отсто од вкупниот увоз на автомобили и со 3 отсто од вкупниот извоз. Во 2025 година, целосно електричните автомобили зафаќаа 20 отсто од увозот на автомобили во ЕУ и 18 отсто од извозот, наспроти 0,8 отсто и 1,1 отсто во 2017 година.

Приклучните хибридни автомобили претставуваа 17 отсто од увозот и 9 отсто од извозот на автомобили, додека во 2017 година тие учествуваа со 1,2 отсто од увозот и 1,8 отсто од извозот. Неприклучните хибридни автомобили зафаќаа 23 отсто од увозот и 14 отсто од извозот, наспроти 8 отсто и 0,3 отсто во 2017 година.

Од вкупно 12,6 милиони автомобили произведени во ЕУ во 2025 година, речиси 40 отсто биле хибридни или електрични возила, односно 4,8 милиони автомобили. Тоа претставува зголемување од речиси еден милион во споредба со 2024 година, кога биле произведени 3,9 милиона вакви возила. Во 2025 година, 17 отсто од автомобилите произведени во ЕУ биле електрични, 7 отсто биле приклучни хибриди, а 14 отсто неприклучни хибриди.

Вредноста на производството на електрични и хибридни автомобили во 2025 година изнесувала 139 милијарди евра, наспроти 123 милијарди евра претходната година. Меѓу електричните и хибридните возила, електричните автомобили имале највисока вредност од 68 милијарди евра, во споредба со 58 милијарди евра во 2024 година. По нив следат неприклучните хибридни автомобили со 38 милијарди евра, исто како и во 2024 година, и приклучните хибридни автомобили со 33 милијарди евра, што е зголемување од 27 милијарди евра.

Тоа во вредносен удел од вкупното производство во ЕУ изнесува 21 отсто за електричните автомобили, 12 отсто за неприклучните хибридни автомобили и 10 отсто за приклучните хибридни автомобили.

Кина беше најголемиот партнер на ЕУ за увоз, со 42 отсто од целиот увоз на електрични автомобили, по што следат Јужна Кореја со 27 отсто и Јапонија со 9 отсто. Најголемите три извозни партнери за електрични автомобили беа Обединетото Кралство со 35 отсто, Соединетите Американски Држави и Норвешка со по 14 отсто.