Измамници ја искористиле адресата на лондонски паб за лажни резервации на Booking.com

Петгодишен маж од Лафборо, Лестершир, платил 73 фунти за едноноќен престој за своето семејство преку Booking.com во „Луксусните апартмани Лондон Крун“ (The London Crown), со цел да гледаат мјузиклот „Хамилтон“ во Вест Енд. Пол Досон, како што пренесува BBC, резервацијата ја направил во август, а неколку дена подоцна открил дека адресата наведена во огласот е всушност пабот „Либерти Баундс“ (The Liberty Bounds), објект на Ветерспун во близина на Тауербриџ.

Организацијата за заштита на потрошувачите „Which?“ соопшти дека вработените во Ветерспун отфрлаат по 20 туристи дневно, откако измамници ја искористиле адресата на пабот како оглас за „блок луксузни апартмани“. Според „Which?“, бил забележан и оглас за „Апартмани во близина на Биг Бен“, со адреса на „Порткулис Хаус“, дел од комплексот на Долниот дом на парламентот, каде што работат стотици пратеници.

Booking.com изјавил за „Which?“ дека во двата случаи огласите за легитимни имоти биле мета на „софистициран фишинг напад, кој им овозможил на криминалците да ги преземат огласите“. Ветерспун пак наведува дека ја информирал платформата „штом дознале“ за измамата. Досон добил е-пошта од „Лондон Крун“ со линк до лажна страница на Booking.com, која барала податоци за неговата банкарска сметка. Тој се пожалил на платформата, но, како што изјавил за „Which?“, од Booking.com му рекле дека треба да отиде до „лажниот апартман“ и да чека по 19 часот пред да му најдат алтернатива — и покрај тоа што им објаснил дека открил оти адресата е паб. Досон, кој има деца со аутизам, рекол дека идејата да се појават на непостоечки имот во 22:30 часот „би била катастрофална“. Семејството на крајот престојувало во хотелот „Премиер Ин“ во Гудџ Стрит.

Огласот за „Лондон Крун“ имал 250 негативни рецензии од август и септември, заедно со неколку веројатно лажни позитивни оценки, според „Which?“. BBC го проверил огласот во четвртокот — информациите сè уште биле видливи, но страницата носела порака дека имотот во моментот не прима резервации. Ветерспун соопштил дека огласот бил отстранет, но повторно се појавил, „иако сега изгледа дека можноста за резервација е блокирана“. Компанијата побарала трајно отстранување и оценила дека е „неприфатливо луѓето да бидат измамени на толку дрзок начин“.

Многу клиенти во рецензиите навеле дека пријавиле измама до Booking.com, но биле игнорирани. Еден клиент рекол дека пријавил три дена пред пријавувањето, но „одбиле да преземат било што“, додека клиентка од Шпанија се пожалила дека таа и нејзината пријателка останале без сместување — „две девојки сами во Лондон во два часот по полноќ“. Платформата има и AI планирач на патувања наречен „Дот“, кој на прашање на истражувач на „Which?“ дали „Лондон Крун“ е вистински имот или измама, одговорил дека станува збор за „легитимен имот“ и дека е „погодно сместен во близина на сафари-паркот Лонглит“, кој се наоѓа на повеќе од 100 милји од Лондон, во Вилтшир.