Ирска пријави дефанзивец како голман за мечот со Израел откако Базуну одби да настапи

Репрезентацијата на Република Ирска прибегна кон решение што ретко се гледа на највисоко ниво во фудбалот — во пресрет на натпреварот против Израел, еден од дефанзивците официјално е пријавен како голман. Станува збор за Џими Дан, кој вообичаено игра во одбраната, но неговото име се најде меѓу тројцата голмани на Ирска за овој натпревар. Причината е повлекувањето на Гевин Базуну, кој одлучи да не настапи против Израел.

Според правилата на УЕФА, репрезентациите мора да имаат пријавено тројца голмани за натпреварот, па Ирците мораа да најдат невообичаено решение. Покрај Каоимин Келехер и Макс О'Лири, на списокот официјално се најде и Дан. УЕФА го потврди неговото пријавување како трет голман, иако неговата природна позиција е во одбраната. Дан претходно не настапи во поразот на Ирска од Косово со 1-0, па токму тој беше избран да ја пополни празнината на списокот за голмани.

Целата ситуација произлезе од одлуката на Базуну да не биде дел од натпреварот со Израел. Ирскиот голман објасни дека неговата одлука е донесена врз основа на лични убедувања. „Претставувањето на мојата земја ми значи сè. Имам огромна почит кон сите мои соиграчи, селекторот, стручниот штаб и ирскиот народ“, порача Базуну. Тој нагласи дека неговата одлука не е насочена против израелскиот народ или еврејската заедница, туку дека се спротивставува на страдањето на невини луѓе и на злосторствата.

Одлуката предизвика реакции и во самата репрезентација. Дел од фудбалерите размислувале да му се приклучат на Базуну, а тренингот и прес-конференцијата биле одложени. Сепак, по разговорите меѓу играчите било одлучено натпреварот да се одигра. Според поранешниот селектор Брајан Кер, 14 фудбалери гласале за одигрување на натпреварот, додека осум биле против.

Фудбалската асоцијација на Република Ирска потоа потврди дека националниот тим ќе ги исполни обврските во Лигата на нации и ќе настапи против Израел. Така, во центарот на вниманието пред самиот натпревар се најде и една несекојдневна сцена. Џими Дан, иако дефанзивец, официјално е регистриран како голман. Се разбира, не се очекува да застане меѓу стативите, но неговото име ќе биде запишано на списокот на чувари на мрежата. Потег кој доволно говори за необичната ситуација во која се најде ирската репрезентација.