Интересот за големи дата центри во Македонија останува без конкретен проект

Повеќе од десет меѓународни компании изразиле интерес за изградба на големи податочни (дата) центри во Македонија, но ниту една од нив сè уште не стигнала до фаза во која институциите би можеле да се произнесат за конкретен проект. Ова го изјави министерот за дигитална трансформација Стефан Андоновски во поткастот „Каде се парите? со Горан Теменугов“, пренесува Пари.

Според министерот, се најавува капацитет со моќност од околу 120 мегавати, но тоа засега не претставува потврдена инвестиција и е далеку од реализација. Андоновски објасни дека ниту една од заинтересираните меѓународни компании не е во фаза да има проект по кој институциите треба да се произнесат, односно проект со кој тие би барале локација, изведба и слични услови.

Во целиот процес најдалеку отидени се две познати домашни компании кои, според министерот, се во напредна фаза на подготовка на проекти, планирање на теренот и добивање дозволи за помали центри. Станува збор за капацитети под пет мегавати, со можност за подоцнежно проширување.

Андоновски потсети дека во регионот има значителен интерес за вакви инвестиции и дека голем дел од соседните држави многу рано започнале со нивно привлекување. Како предничат Романија, Грција, Унгарија и Бугарија, каде веќе има развој на дата центри, додека во Македонија интересот на меѓународните компании сè уште не е преточен во конкретен проект.

Министерот се осврна и на една идеја од 2024 или 2025 година за браунфилд инвестиција во центар за податоци во постоечка фабрика во Македонија, но таа инвестиција, како што рече, сè уште не го гледа светлото на ден.

Од изнесеното произлегува дека најавите за големи дата центри со капацитет од околу 120 мегавати остануваат далеку од реализација, додека единствениот поконкретен напредок е забележан кај два домашни проекти со значително помал капацитет, под пет мегавати, кои се уште се во фаза на подготовка и добивање дозволи.