ИНОВА потпиша договор за физибилити студија – прв чекор кон Научно-технолошки парк во Македонија
Агенцијата за иновации, научно-технолошки развој и претприемништво – ИНОВА денеска потпиша договор со компанијата European Innovation Solutions S.A. за изработка на физибилити студија, подготовка и дизајнирање на оперативна рамка и бизнис-план за основање на Научно-технолошки парк. Со овој чекор официјално започнува процесот на подготовка на сеопфатна анализа која треба да ја утврди изводливоста и потенцијалите за воспоставување на ваква институција во земјата.
Оваа иницијатива е една од стратешките определби на Владата, која Министерството за образование и наука и ИНОВА заеднички ја спроведуваат. Нејзината цел е создавање современа инфраструктура за научноистражувачка дејност, технолошки развој и претприемништво, како и посилно поврзување на академската заедница со реалниот сектор. Паркот е замислен како централно национално јадро за развој и поддршка на иновациите.
Според договорот, физибилити студијата ќе опфати детална анализа на можностите за воспоставување модел на јавно-приватно партнерство. Паралелно со тоа, ќе се изработи бизнис-план заснован на интегриран аналитички пристап, со прецизно дефинирани активности, организација на работата и временска рамка за реализација.
Крајниот резултат од ангажманот на European Innovation Solutions S.A. ќе опфати интегриран концепт и мастер-план, техничка рамка, институционален и управувачки модел, деловен, оперативен и финансиски модел, како и јасен патоказ за имплементација. Притоа, задолжително ќе биде разработен и модел за воспоставување на јавно-приватно партнерство, што претставува клучен елемент во планирањето на идниот парк.
На средбата по повод потпишувањето на договорот, од страна на European Innovation Solutions S.A. присуствуваа д-р Парис Кокоротсикос, тим-лидер и експерт за воспоставување научно-технолошки паркови, како и Никос Џанулидис, експерт за иновациски екосистеми, деловни операции и бизнис-планирање. Нивното присуство ја потврдува сериозноста на проектот и фокусот врз меѓународно искуство во областа на развојот на иновациска инфраструктура.
Со потпишувањето на договорот, ИНОВА и Министерството за образование и наука прават конкретен чекор кон реализација на зацртаната стратешка иницијатива. Доколку студијата покаже позитивни резултати, Научно-технолошкиот парк би можел да стане централно место за поврзување на науката, технологијата и бизнисот, со што би се зајакнал економскиот развој на земјата и би се создале услови за поттикнување на иновациите во реалниот сектор.