Инфинеон: Побарувачката за чипови за AI центри расте и покрај отпорот

Германскиот производител на чипови Инфинеон очекува силната побарувачка за чипови што ја напојуваат инфраструктурата за вештачка интелигенција да го одржи растот на компанијата, и покрај сè поголемата загриженост за еколошките и економските трошоци од проширувањето на центрите за податоци. Од Инфинеон во вторникот изјавија дека брзата изградба на AI центри за податоци нема да забави, иако расте отпорот во Соединетите Американски Држави, и предвидеа дека тој отпор веројатно ќе се прошири и во други земји.

Во САД расте противдејството против еколошките и енергетските трошоци на овие големи локации, а многу демократски победници на неодамнешните меѓуизбори ветија дека ќе ги забават проектите. Јохен Ханебек, главен извршен директор на германскиот гигант што има корист од производството на енергетски чипови што се користат во центрите, на состанокот за финансиски резултати призна дека има „сè поголеми дебати за проширување на AI инфраструктурата“. Но, тој рече дека ова е „тема која е повеќе насочена кон Америка“.

„Се разбира, низ целиот свет има загриженост изразена од луѓето што живеат во непосредна близина на AI центрите за податоци“, додаде Ханебек, но „низ целиот свет има многу региони што се многу ретко населени“. „Верувам дека операторите на овие центри за податоци и американските хиперскалери ќе најдат области што не се нужно сите лоцирани во САД, можеби и во други земји каде што можат да се изградат AI центри за податоци“, рече тој. „Верувам дека проширувањето на центрите за податоци ќе се диверзифицира на регионална основа. Верувам дека тоа е добра тенденција.

Инфинеон во вторникот објави раст на приходите од 12 отсто за својата фискална година што завршува на крајот на септември и предвиде раст на продажбата до 20 отсто во тековната година поради побарувачката од AI центрите за податоци. Компанијата не произведува самите AI процесори, како оние што ги дизајнира Нвидија, туку ги снабдува чиповите што помагаат да се достави електрична енергија од мрежата до локациите.

„Вештачката интелигенција дава вистинска вредност, а нејзиното значење само ќе расте“, рече Ханебек, нарекувајќи ја технологијата „клучен двигател на нашиот раст и профитабилност“.