Илон Маск се откажа од антимонополската тужба против „Епл

Компаниите X Corp и SpaceXAI, поврзани со Илон Маск, поднесоа барање за отфрлање на антимонополската тужба против „Епл“, со која производителот на iPhone беше обвинет дека соработувал со OpenAI за да ги монополизира пазарите на паметни телефони и генеративни AI-чат-ботови. Според Ројтерс, барањето е поднесено во понеделникот, но во судскиот документ не е наведено објаснување за откажувањето, ниту пак има индикација дали страните постигнале спогодба, пренесува CNBC.

„Епл“, компаниите на Маск и OpenAI не одговориле на барањата за коментар. Тужбата беше поднесена минатата година пред сојузниот суд во Тексас, а во неа се тврдеше дека „Епл“ го прекршил антимонополскиот закон кога го вградил ChatGPT од OpenAI во пакетот Apple Intelligence на iPhone и други уреди на „Епл“.

X и SpaceXAI тврдеа дека „Епл“, дејствувајќи заедно со OpenAI, ја исклучиле конкуренцијата. Во тужбата се наведуваше дека двете компании „ги заклучиле пазарите за да ги задржат своите монополи и да им попречат на иноваторите како X и xAI да се натпреваруваат“.

Од компаниите на Маск посочија дека правната борба со OpenAI продолжува, бидејќи таа компанија останува наведена во тужбата. „Епл“, пак, барајќи отфрлање на случајот, тврдеше дека ништо во неговиот договор со OpenAI не пречи на втората компанија да соработува со конкуренти. OpenAI ја опиша правната офанзива на Маск како „кампања на lawfare“ против неа. Двете компании негираа каква било неправилност.

Судија во ноември одлучи дека случајот може да продолжи, што беше прелиминарна победа за компаниите на Маск. Одделна тужба на Маск против OpenAI, во која се тврдеше дека компанијата отстапила од својата основачка мисија да гради AI за доброто на човештвото наместо за профит, беше отфрлена во мај. SpaceXAI е дел од SpaceX.