Илјадници вработени во „Барклис“ се бунат против враќањето во канцелариите

„Барклис“ се соочува со растечки отпор поради плановите за враќање на вработените во канцелариите. Илјадници вработени бараат исплати за покривање на патните трошоци и ослободување за оние што живеат на повеќе од 40 минути од работното место, објави „Гардијан“.

Синдикатот „Јунајт“, кој претставува речиси 80 отсто од 45.000 вработени на „Барклис“ во Обединетото Кралство, стои зад барањата на персоналот. Според синдикатот, илјадници вработени потпишале отворено писмо испратено до раководството на банката, кое претходно го објавил „Фајненшл тајмс“, а кое нашироко циркулира низ канцелариите на банката во земјата. Синдикатот планира во наредните денови да разговара со „Барклис“ за грижите на вработените.

Плановите на банката, објавени претходно ова лето, предвидуваат вработените да се вратат во канцелариите најмалку три дена неделно од октомври, додека повисоките вработени се очекува да доаѓаат најмалку четири дена неделно. Актуелната политика бара вработените со полно работно време во „Барклис“ да бидат присутни најмалку два дена неделно.

Националниот функционер на „Јунајт“, Рик Којл, изјави дека едно од прашањата што предизвикало загриженост е тоа што повеќето работодавачи во банкарството и финансиските услуги вообичаено прифаќаат поголема флексибилност. Според него, членовите на синдикатот сметаат дека „Барклис“ се обидува да реши проблем што не постои. Тој додаде дека илјадници вработени го потпишале писмото и дека бројката продолжува да расте.

Одлуката на „Барклис“ за враќање во канцелариите е слична на оние на други големи банки, кои ги заострија политиките за работа од дома по пандемијата на ковид, особено за помладите вработени. Меѓу нив е и „ЏејПиМорган“, чиј извршен директор Џејми Дајмон минатата година изјави за „Блумберг“ дека станува збор за систем на учење преку работа и дека човек не може да учи работејќи од подрум.

Портпарол на „Барклис“ изјави дека банката ги признава придобивките од балансирање на флексибилноста за колегите со важноста на заедничката работа во физичките простории. Според него, минималните барања за присуство во канцеларија се разликуваат по деловни области, одразувајќи ја природата на работата и потребите на бизнисот. Тој додаде дека повеќето колеги кои веќе не работат во канцеларија три дена неделно ќе се усогласат со поширокиот пристап на банката, а највисоките раководители ќе поминуваат дополнителен ден во канцеларија за поддршка на соработката, одлучувањето и видливоста на лидерството.