Хуанг: Нвидија следната година ќе продаде двојно повеќе чипови

Извршниот директор на Нвидија, Јенсен Хуанг, изјави во четвртокот дека неговата компанија следната година ќе продаде двојно повеќе чипови од оваа година. „Очекувам Нвидија следната година да продаде двојно повеќе чипови отколку што продаваме оваа година“, им рече Хуанг на новинарите пред самитот со британскиот крал Чарлс Трети во Шкотска.

Ова е најновата прогноза од Нвидија која укажува на продолжен масовен раст во следните шест квартали. Таа доаѓа набргу откако компанијата откри дека очекува раст од 70 отсто во фискалната година што завршува во јануари 2028 година, односно околу 673 милијарди долари, што предизвика скок на очекувањата на аналитичарите.

Хуанг објасни дека причината за ваквата прогноза лежи во придонесот на вештачката интелигенција за различни индустрии и економии. „Причината за тоа е затоа што вештачката интелигенција има толку голем придонес за придобивките на различни индустрии, различни економии, и тоа може да се види во речиси секоја земја во која сме присутни — луѓето сакаат да инвестираат во вештачка интелигенција“, рече тој.

Нвидија не го открива вкупниот број на продадени чипови. Нејзини најпознати производи се графичките процесори за дата-центри, како чиповите „Блеквел“ и „Рубин“. Минатата есен Хуанг изјави дека Нвидија испорачала шест милиона „Блеквел“ графички процесори во четири квартали.

На самитот со Хуанг присуствуваа и претставници на „Гугл ДипМајнд“, „ОпенAI“ и „Антропик“. Тој беше во Обединетото Кралство за да разговара за безбедноста на вештачката интелигенција, тема за која постојано се изјаснуваше во последните недели. Јавната расправа за ризиците за човештвото достигна врв откако истражувачите на вештачка интелигенција предупредија дека луѓето повеќе не се во можност да ја контролираат најнапредната вештачка интелигенција. „Кога еден производ не е безбеден, треба да го задржиме и да продолжиме да го усовршуваме“, рече Хуанг.