Хуанг — најблизок сојузник на Трамп во дебатата за безбедност на вештачката интелигенција
Додека во Вашингтон оваа недела беснее дебатата за регулирање на вештачката интелигенција, американскиот претседател Доналд Трамп го крена телефонот и го повика својот најблизок сојузник на оваа тема — извршниот директор на Nvidia, Џенсен Хуанг. „Роботите нема да го преземат светот“, му рече Трамп на Хуанг, кој го стави претседателот на звучник додека беше на сцената на самитот All-In во Лос Анџелес во понеделникот. Трамп го повтори ставот што го изнесе на социјалните мрежи — дека растечките грижи околу вештачката интелигенција и центрите за податоци се „измама“.
Иако и други технолошки лидери, како извршниот директор на Meta, Марк Цукерберг, и основачот на Amazon, Џеф Безос, се приближија до Трамп за време на неговиот втор мандат, експертите за CNBC велат дека Хуанг врши несоразмерно големо влијание во Белата куќа. Според извор запознаен со работата, кој побара да остане анонимен поради доверливост, Хуанг треба да присуствува на високиот државен прием што Трамп ќе го приреди за кинескиот претседател Си Џинпинг следната недела.
Nvidia ја поттикнува експанзијата на вештачката интелигенција уште пред лансирањето на ChatGPT кон крајот на 2022 година, снабдувајќи ги OpenAI, Anthropic и други со графички процесори за обучување на нивните модели и извршување на големи работни оптоварувања. Приходите на компанијата скокнаа на 215 милијарди долари во последната фискална година, од 17 милијарди долари во 2021 година. Позицијата на Хуанг како прв човек на највредната компанија во светот и на производителот на чипови во срцето на бумот на вештачката интелигенција му го обезбеди вниманието на претседателот за најважните теми во оваа област.
„Трамп едноставно ги сака победниците, а Џенсен е многу вешт во говорењето на неговиот јазик“, изјави во интервју Семјуел Хамонд, директор за политики за вештачка интелигенција во тинк-тенкот Foundation for American Innovation. Портртпаролот на Nvidia одби да коментира, а претставниците на Белата куќа не одговорија на барањето за коментар. Хуанг научи како да му се допадне на претседателот — било кога му се придружува на Трамп на вечера при свеќи во неговиот клуб Мар-а-Лаго на Флорида, било кога го затвора своето излагање со благодарност до гостите што „ја прават Америка повторно величествена“. Трамп и Хуанг во јавноста се појавија заедно најмалку шест пати од почетокот на вториот мандат, вклучително и патувања во Саудиска Арабија и Обединетото Кралство, како и неодамнешното патување во Кина со Air Force One.
Хуанг се залага американската вештачка интелигенција да оди побрзо, додека некои од најважните клиенти на Nvidia — OpenAI и Anthropic — го зголемуваат притисокот врз владите да ја регулираат технологијата поради стравувањата од нејзините можни опасности. Истражувачот во Anthropic, Џејкоб Коксон, кој претходно работеше во OpenAI, изјави дека овој месец ја напуштил работата поради загриженост дека водечките лаборатории за вештачка интелигенција „се коцкаат со нашите животи“. Неговата оставка предизвика бура на социјалните мрежи и повици за поголем надзор од повеќе од 20 членови на Конгресот. Загриженоста веќе беше присутна откако OpenAI откри значителен безбедносен инцидент во јули, кога два нејзини модели ја напуштија контролата, пристапија до отворениот интернет и пробија во онлајн-репозиториумот за вештачка интелигенција Hugging Face за да добијат подобар резултат на тест.
Хуанг зазеде поинаков став. Во јавните настапи изминатава недела, извршниот директор на Nvidia ги отфрли грижите за ризиците од вештачката интелигенција. Тој рече дека предвидувањата за пропаст не се засноваат на наука и дека развивачите на модели се одговорни да ги обезбедат своите производи пред да ги објават. Решението за безбедносните грижи, изјави Хуанг во Шкотска во четвртокот, е „добро старо инженерство“. „Имаше инциденти, и тие инциденти, за среќа, не нанесоа штета“, рече Хуанг.