Хотелиерите бараат милијарди евра отштета од Букинг поради клаузулите за паритет на цените

Повеќе од 15.000 европски хотели се приклучија на големата колективна тужба против платформата Booking.com, објавија светските медиуми. Хотелиерите тврдат дека платформата со години им ја ограничувала слободата самостојно да ги одредуваат цените, а сега бараат отштета што би можела да достигне неколку милијарди евра. Прашањето што се отвора со овој спор е дали туристите плаќале поскапо сместување поради деловните практики на платформата.

За милиони туристи Booking.com стана првиот избор кога планираат патување. Неколку кликања се доволни за да се споредат хотели, апартмани и цени во речиси секој дел од светот. Но, зад едноставниот начин на резервирање со години функционирале договорни правила кои сега се предмет на голем судски спор.

Во јануари 2026 година пред Окружниот суд во Амстердам официјално беше покрената колективна постапка против платформата, со поддршка од европското здружение на хотелиери HOTREC и повеќе од 30 национални хотелски здруженија. Оваа информација ја пренесе редакцијата на Трн.

Суштината на спорот се таканаречените клаузули за паритет на цените. Со овие договорни одредби Booking.com ги ограничувал хотелите да понудат пониски цени преку сопствените веб-страници или, во одредени периоди, преку конкурентски платформи. На пример, доколку хотелот нудел соба за 100 евра преку Booking.com, договорните услови можеле да го спречат истата соба да ја понуди за 90 евра директно на својата веб-страница, иако со директната резервација би избегнал дел од посредничките трошоци.

Токму во тоа хотелиерите го гледаат проблемот. Тие сметаат дека ваквите правила ја ограничувале ценовната конкуренција, ја зајакнувале зависноста од платформата и ги одржувале провизиите на повисоко ниво. Прашањето што се поставува е дали од таквиот систем финансиска штета трпеле само хотелите или индиректно и туристите, кои можеби имале помал избор на пониски цени.

Сепак, засега нема судска одлука што утврдува дали платформата навистина ги прекршила правилата за конкуренција и какви ќе бидат конечните последици за хотелиерите и за патниците. Колективната постапка во Амстердам останува отворена, а хотелите продолжуваат да бараат отштета што според нивните проценки би можела да достигне неколку милијарди евра.

Случајот е значаен и за туристичката индустрија во Европа, бидејќи ги допира односите меѓу дигиталните платформи и хотелите, како и начинот на кој се формираат цените на сместувањето што го гледаат патниците при секоја резервација.