Гугл“ изгуби над 500 милијарди долари: стравот од вештачката интелигенција ја разбранува Волстрит

„Алфабет“, компанијата-мајка на „Гугл“, загуби нешто над 500 милијарди долари вредност во четвртокот, откако со последното годинешно известување за работењето ги вознемири инвеститорите на Волстрит. Акциите на „Гугл“ паднаа на најниско ниво во последните шест месеци, откако компанијата откри дека резимираните резултати од пребарувањето со вештачка интелигенција влијаат врз приходите од рекламирање.

На прв поглед, кварталните резултати на „Алфабет“ воопшто не беа лоши. Вкупните приходи пораснаа за 25 отсто во споредба со лани и достигнаа 127,6 милијарди долари, поткрепени од постојаниот успех на „Гугл клауд“, каде приходите скокнаа за 103 отсто на речиси 31 милијарда долари. Сепак, профитот на компанијата падна значително – за 25 отсто во текот на кварталот. По втор пат во историјата како јавно тргувана компанија, „Алфабет“ покажа негативен слободен готовински тек, овој пат над 9 милијарди долари, што е речиси двојно повеќе од загубата на готовина прикажана само три месеци претходно.

Готовинскиот тек го претставува парите што компанијата ги задржува откако ќе ги плати операциите и инвестициите, што значи дека „Алфабет“ сега троши повеќе отколку што прибира. Тоа ново ниво на трошење е речиси целосно посветено на инвестициите на „Гугл“ во вештачка интелигенција. До крајот на четвртокот, вкупната пазарна вредност на компанијата падна на 3,46 трилиони долари од 3,97 трилиони долари претходниот ден.

Сеприсутниот пребарувач на „Гугл“ сега стандардно прикажува резимеа со вештачка интелигенција за прашањата на корисниците, а тоа влијаеше врз бројот на реклами што компанијата успеа да ги продаде во кварталот. Продажбата на реклами што се појавуваат покрај резултатите од пребарувањето на „Гугл“ го сочинува огромното мнозинство од работењето на „Алфабет“.

Трејси Ву, главен аналитичар во „Форестер“, оцени дека разочарувачките резултати во пребарувањето „ја нагласуваат тешкотијата да се финансираат масивни инвестиции во вештачка интелигенција додека се одржува силата на воспоставените бизниси“. Филип Шиндлер, главен деловен директор на „Гугл“, во средата изјави дека се чувствува „многу добро за нашата траекторија“ со верзијата на пребарувачот насочена кон вештачка интелигенција, но акциите на компанијата во четвртокот паднаа за речиси 13 отсто, што е нивно второ најслабо ниво годинава.

И „Мајкрософт“ и „Амазон“ оваа недела известија инвеститорите и им се придружија на „Гугл“ во плановите да продолжат да трошат астрономски суми готовина во трката за вештачка интелигенција. Но, инвеститорите изгледаа разочарани од влијанието што овие планови го имаат врз способноста на секоја од компаниите да продолжи да ги расте своите основни деловни линии.