Германските гласачи им свртија грб на демохристијаните — левицата и крајната десница профитираат, реформите за раст во опасност

Германскиот канцелар Фридрих Мерц призна дека резултатите од локалните избори за неговата Христијанско-демократска унија (ЦДУ) претставуваат „катастрофа“. На изборите во Берлин и во североисточната покраина Мекленбург-Западна Померанија, кои се одржаа за време на викендот, убедлива победа извојуваа левицата и крајната десница, што според економистите дополнително ја зголемува политичката нестабилност во најголемата европска економија и ги загрозува нејзините изгледи за раст.

Во Берлин првото место го освои партијата Левица (Die Linke), додека во Мекленбург-Западна Померанија најмногу гласови доби крајнодесничарската Алтернатива за Германија (AfD). Централно-десната ЦДУ, која од 2025 година ја предводи националната коалициска влада под водство на Мерц, доживеа уште еден тежок удар. Иако AfD најверојатно нема да може да управува во Мекленбург-Западна Померанија поради бојкотот на другите партии за каква било соработка со крајната десница, нејзиниот успех дава дополнителен залет на политичката сила која претходно овој месец победи на уште едни покраински избори и која според анкетите на Politico е во водство по националните изборни намери.

Мерц во неделата изјави дека ќе остане на власт и покрај резултатите и вети дека ќе продолжи со мерките за заживување на германската економија.

На прес-конференција во понеделникот, Мерц изрази благодарност до Социјалдемократската партија за нејзината посветеност како помлад коалициски партнер, нагласувајќи дека заедно се решени да се справат со историските предизвици со кои се соочува земјата. Неговата популарност опадна поради незадоволството на јавноста од растот на цените, нестабилноста во енергетиката, стагнацијата на платите, колапсот на традиционалните производствени и индустриски сектори и недостатокот на лидерство во зелената транзиција.

Пазарите во понеделникот ги игнорираа изборните резултати — приносите на германските обврзници паднаа, а берзите забележаа раст во согласност со глобалните движења. Ендрју Кенингем, главен економист за Европа во Capital Economics, оцени дека влијанието ќе се почувствува на подолг рок. Според него, изгледите за раст на Германија се подобрија, со очекуван економски раст од околу 1 отсто, но тоа се должи на привремени фактори, меѓу кои фискалниот стимул и слабеењето на ефектите од енергетскиот шок од 2022 година. Тој потсети дека Германија се соочува со масивни структурни предизвици поради високите цени на енергијата, пререгулираниот и скап пазар на труд, големата изложеност на „кинескиот шок“ и демографскиот пад, поради што не е добро позиционирана да ги искористи технолошките промени, вклучително и вештачката интелигенција.

Карстен Брзески, глобален шеф за макроекономија во ING, изјави за CNBC дека изборните резултати покажуваат како годините на економска стагнација ја зајакнаа крајната десница и левицата и дека „нема мнозинство во корист на реформите“. Тој оцени дека ситуацијата наликува на ќор-сокак, имајќи предвид дека ЦДУ е во „екзистенцијална криза“ што ја отежнува нејзината способност да соработува со другите партии.