Филипче: Буџетот е во катастрофална состојба, недостигаат 900 милиони евра, а Владата прави втор ребаланс за пополнување дупки

Буџетот на државата е во катастрофална состојба и во него недостигаат 900 милиони евра, а вториот ребаланс што го подготвува Владата е признание за лошото водење на финансиите и економијата, изјави претседателот на СДСМ, Венко Филипче, на денешната прес-конференција. Според него, дополнително недостигаат средства и во Фондот за пензиско и инвалидско осигурување, поради што се отвора прашањето од кои извори ќе се исплаќаат платите и пензиите во следниот период.

„Сè повеќе на виделина излегува дека буџетот е во катастрофална состојба, фалат скоро милијарда евра, 900 милиони евра недостасуваат во буџетот, дополнително во Фондот за пензиско и инвалидско осигурување за пензии недостасуваат исто така уште една милијарда евра. Сериозно е загрозена стабилноста на буџетот, како и тоа дека сè повеќе се отвораат прашањата од каде и од кои извори во следниот период, дали пред Нова година, дали на почетокот на следната година, ќе се исплаќаат плати и пензии“, рече Филипче.

Тој нагласи дека, додека другите држави веќе разговараат за буџетите за следната година, Македонија прави втор ребаланс во текот на една година. „Нема држава која што сега прави втор ребаланс на буџетот. Сега сите држави кои што добро се менаџираат, веќе разговараат за буџетите за 2027 година. Што ние правиме? Ребаланс за, само што ќе заврши овој ребаланс, да почне и да се отвори дискусијата за буџетот за следната година. Нема поголем доказ за лошо менаџирање на буџетот, финансиите и економијата од страна на Христијан Мицкоски од овој втор ребаланс“, истакна Филипче.

Претседателот на СДСМ подвлече дека со ребалансот нема пари за поголеми плати и подобар стандард, туку се кратат капиталните инвестиции и се отвора пат за ново задолжување. „Кога не носи подобар стандард за граѓаните, нема пари за поголеми плати, нема фискална стабилизација, нема капитални инвестиции, напротив, тие се кратат, ова претставува ребаланс за да се направи задолжување за трошење, односно ребаланс со кој што ќе се пополнат дупките во буџетот. Тотален дебакл и практично признание дека сè е промашено при конструирањето на овој буџет“, рече Филипче.

Тој потсети дека со јулскиот ребаланс дефицитот бил зголемен со образложение дека средствата ќе одат за капитални инвестиции, но сега тие инвестиции се кратат, додека зголемениот дефицит останува. Според него, тоа покажува дека првичните проекции не биле реални и дека фискалната политика на Владата не успеала да обезбеди стабилност, туку дополнително ја влошила состојбата со јавните финансии.

Филипче оцени дека ваквиот развој на настаните претставува сериозен сигнал за граѓаните, бидејќи несигурноста околу исплатата на платите и пензиите директно влијае врз секојдневниот живот на домаќинствата. Тој повика на одговорност и на транспарентно претставување на вистинската состојба со буџетот, наместо, како што рече, да се прикриваат последиците од лошото управување со јавните пари.