Филипче бара оставка од гувернерот Славески и истрага за влезот на Алта банка во земјата

Опозициската СДСМ побара гувернерот на Народната банка на Македонија, Трајко Славески, да поднесе оставка и Основното јавно обвинителство да поведе истрага за тоа како е дозволен влезот на Алта банка на македонскиот пазар. Барањето го изнесе потпретседателот на партијата Венко Филипче на прес-конференција, повикувајќи се на работењето на банката и на настаните во Србија како потврда на предупредувањата што, како што рече, СДСМ ги упатува речиси една година.

Филипче потсети дека т.н. антикорупциски тим на партијата уште во декември лани прашал зошто е дозволен влезот на Алта банка во Македонија. Според него, сега клучното прашање е дали премиерот Христијан Мицкоски и гувернерот Славески добро го процениле ризикот каква банка влегува во земјата или, како што нагласи, многу добро знаеле за што станува збор и се дел од, како што ја нарече, мафијашката мрежа во Србија.

Тој пред новинарите постави низа прашања поврзани со безбедноста на штедните влогови. „Се поставува прашањето дали се загрозени депозитите на нашите граѓани. Се поставува прашањето дали се загрозени депозитите на јавните претпријатија. Се поставува прашањето дали сега некој во Народната банка или во Владата ќе направи нешто да го спречи ова стампедо коешто веќе се случува пред експозитурите на Алта банка во неколку градови во нашата земја“, рече Филипче.

Според него, нормално е дека луѓето се исплашени, поради што апелираше гувернерот јасно и гласно да излезе и да каже дали има простор за грижа на граѓаните. „А гувернерот исто така треба да се соочи не само со својата морална одговорност и да си поднесе оставка, туку да се соочи и со кривична одговорност за што го повикуваме Основното јавно обвинителство да поведе истрага. Дали тој добро знаел на каква банка и овозможува влез во земјата“, додаде Филипче.

Тој ги поврза случувањата околу банката со настаните во Србија, оценувајќи ги како потврда на предупредувањата на СДСМ за влијанието на т.н. „српски свет“ и неговото поврзување со власта на ВМРО-ДПМНЕ. „Ова што се случува во Србија е нешто на што ние укажуваме веќе скоро една година наназад. Ова што се случува во Србија како и влијанието тука кај нас во Македонија е нешто на што укажуваат и европските институции и претседателката на Комисијата Фон дер Лајен, дека тука има влијание на српскиот свет“, рече Филипче.

Тој додаде дека СДСМ со месеци предупредувал за сомнителното работење на Алта банка. Повикувајќи се на, како што вели, медиумски и политички извори, од партијата соопштија дека постојат индиции оти банката е поврзана со криминално стекнати пари, корупција, кражба на пари од граѓаните и шверц на дрога. „И сега тоа на што укажуваме изминатите месеци, Алта банка, којашто и според извори на медиуми и наши политички комуникации во Србија беше банка поврзана со криминално стекнати пари од криминал, од корупција, украдени пари од граѓаните“, наведе Филипче.

Од партијата порачаа дека бараат итна реакција на институциите поради Алта банка, додека од владејачката ВМРО-ДПМНЕ одговорија дека банкарскиот систем е стабилен. Според изнесеното на прес-конференцијата, граѓани чекаат во ред за да повлечат пари од Алта банка во Битола, што говори за загриженоста кај штедачите по случувањата околу оваа финансиска институција.