Фенвеј спортс груп во преговори за мнозински удел во тимот на Кадилак во Формула 1

Сопственикот на Ливерпул, Фенвеј спортс груп, водел разговори за купување мнозински удел во тимот на Кадилак во Формула 1 за повеќе од 2 милијарди фунти. Информацијата доаѓа во момент кога Марк Волтер продолжува да ги распродава своите спортски средства поради обвинувања поврзани со осигурување.

Кадилак годинава влезе во Формула 1 како заедничко вложување меѓу Џенерал моторс и компанијата на Волтер, TWG Global. Таа компанија ова лето го продаде контролниот удел во Лос Анџелес лејкерс од НБА и 13 отсто од Челси, а исто така бара купувач и за Лос Анџелес спаркс, тимот од женската НБА. Волтер е под истрага на американското Министерство за правда и на Комисијата за хартии од вредност поради наводна измама поврзана со управувањето со средства во неговите осигурителни компании Делавер лајф, Клир спринг и Еквитраст. TWG тврди дека „немало измама“.

TWG ги отфрли тврдењата дека продажбата на Кадилак е неизбежна, но Гардијан дознава дека компанијата разговарала со повеќе заинтересирани страни, меѓу кои и Фенвеј спортс груп. Покрај Ливерпул, спортските инвестиции на Фенвеј ги опфаќаат и мнозинските удели во Бостон ред сокс и во тимот од НХЛ Питсбург пенгвинс. Извор запознаен со плановите на групацијата открива дека таа разгледува и други спортски инвестиции, откако ова лето продаде 38 отсто од Ливерпул на конзорциум во кој членуваат основачот на Амазон, Џеф Безос, и косновачот на Фејсбук, Едуардо Саверин. Тој конзорциум има и опција целосно да го преземе клубот од Енфилд пред август 2027 година.

Евентуален влез на Фенвеј во Кадилак би можел да влијае врз неговата позиција во Ливерпул, чија вредност по летошната делумна продажба се проценува на 5,5 милијарди фунти. Тоа би овозможило огромен профит, имајќи предвид дека во 2010 година групацијата го купи целиот клуб за 300 милиони фунти. Фенвеј има историја на инвестирање во мотоспорт преку 50-процентниот удел во тимот од Наскар, РФК рејсинг, а изворот додава дека групацијата била привлечена кон Формула 1 поради извонредниот раст на спортот во последната деценија, особено во САД. Годишните приходи на Формула 1 повеќе од двојно се зголемија, на 4 милијарди долари (3 милијарди фунти), откако Либерти медија го купи спортот во 2017 година, а вредноста на телевизиските права продолжува да расте.

Според претходни извештаи на Спортико, Волтер својот удел во Кадилак го проценува на околу 2,24 милијарди фунти. Големината на уделите на TWG и на Џенерал моторс никогаш не била објавена. Кадилак е на дното од пласманот на конструкторите во својата дебитантска сезона и сè уште нема освоено бод. Фенвеј спортс груп одби да коментира за своите инвестициски планови.